لاہور: برصغیر کے معروف موسیقار اور لافانی دھنوں کے خالق خواجہ خورشید انور کو اس دنیا سے گزرے 32 برس بیت گئے ۔ خواجہ خورشید انور کی بے مثال دھنیں آج بھی سماعتوں میں رس گھولتی ہیں ۔ 27 فلموں کی موسیقی 6 فلموں کے سکرپٹ ، 3 فلموں کی ڈائریکشن اور 6 فلموں کی پروڈکشن ۔ یہ ہیں خواجہ خورشید انور ، خورشید انور خدا داد صلاحیتوں کے مالک تھے ، ان کا تعلق موسیقی کے گھرانے سے نہیں تھا پھر بھی انہوں نے ایسی دھنیں تخلیق کیں جو آج بھی امر ہیں ۔ ایم اے فلسفہ میں اول پوزیشن لینے والے خورشید انور نے ریڈیو سے عملی زندگی کا آغاز کیا ۔ ماچس کی ڈبیا بجا کر دھنیں تخلیق کرنے والے اس فنکار نے فلم   ہیر رانجھا   کی موسیقی بھی ترتیب دی جو آج تک بے حد مقبول ہے ۔ خواجہ خورشید انور نے فلم انتظار ، گھونگھٹ ، چنگاری ، ہمراز ، مرزا جٹ اور شیریں فرہاد سمیت کئی فلموں کی دھنیں ترتیب دیں ۔ ریڈیو پاکستان کی سیگنیچر ٹیون کے خالق خواجہ خورشید انور کی صلاحیتوں کے اعتراف میں اُنہیں نگار ایوارڈ اور ستارہ امتیاز سے بھی نوازا گیا ۔ یہ عظیم موسیقار 32 برس پہلے دنیا سے رخصت ہوا لیکن ایسی لازوال دھنیں چھوڑ گیا جو آج تک لوگوں کی سماعت میں رس گھول رہی ہیں ۔