متحدہ مجلس عمل کی مرکزی قیادت کا کراچی میں سحر ی سے پہلے اجلاس ہوا ہے جس میں مولانا فضل الرحمان نے اعلان کیا کہ مجلس عمل 8جون کو کراچی میں جلسہ کرے گی۔

کلفٹن میں واقع بیت رضوان میں متحدہ مجلس کا اہم اجلاس ہوا جس میں مجلس عمل کے صدر مولانا فضل الرحمان، جماعت اسلامی کے امیر سراج الحق، شاہ اویس نورانی، مفتی غوث صابری اور علامہ واحد عابدی سمیت دیگر نے شرکت کی۔

اجلاس کے بعد مولانا فضل الرحمان نے میڈیا سے گفتگو کرتے ہوئے کہا کہ آئندہ عام انتخابات وقت پر ہونے چاہئیں۔

ان کا کہنا تھا کہ ہم دنیا سے برابری کی بنیاد پر معاملات طے کرنا چاہتے ہیں، انتخابی حلقہ بندیوں کے لیے الیکشن کمیشن کا ادارہ موجود ہے۔

مولانا فضل الرحمان نے مزید کہا کہ ہم نے جمہوری اداروں کو مستحکم کرنا ہے، کسی غیر جمہوری ادارے کو جمہوریت پر مسلط کرنےکا عمل ختم کرنا ہے۔

ان کا یہ بھی کہنا تھا کہ مجلس عمل سے باہر موجود مذہبی اداروں ،علماء اور مشائخ کو بھی اپنے مقصد میں شامل ہونے کی استدعا کی ہے، 5 جون کو اسلام آباد میں جلسے کا انعقاد کر رہے ہیں۔

مولانا فضل الرحمان نے مزید کہا کہ 5 جون کو اسلام آباد کے جلسے میں متحدہ مجلس عمل کے منشور کا اعلان کریں گے۔

صدر متحدہ مجلس عمل نے یہ بھی کہا کہ پاکستان کی معیشت کوٹھیک کرنا ہو گا، ہم دنیا کے ساتھ ایڈجسٹ ہونا چاہتے ہیں اور اپنے وسائل کی بنیاد پر خود کفیل ہونا چاہتے ہیں۔