پاکستان تحریک انصاف کے رہنما عثمان ڈار نے خواجہ آصف کی تاحیات نااہلی ختم ہونے پر انہیں مبارکباد دیتے ہوئے کہا ہے کہ اب ان سے مقابلہ سیالکوٹ میں عوام کی عدالت میں ہوگا۔

سپریم کورٹ کے باہر میڈیا سے گفتگو میں عثمان ڈار کا کہنا تھا کہ ‘جب خواجہ آصف کو نااہل کیا گیا تھا تو انہوں نے کہا تھا کہ عثمان ڈار مجھے سیالکوٹ میں شکست نہیں دے سکا تو اس نے عدالتوں کا سہارا لیا۔

انہوں نے کہا کہ ‘مجھے خوشی ہے کہ اب خواجہ آصف سے میرا مقابلہ سیالکوٹ کی عوام کی عدالت میں ہوگا، جبکہ عثمان ڈار کے وکیل فیصل چوہدری نے اس موقع پر کہا کہ تفصیلی فیصلہ آنے پر تمام نکات کا جائزہ لینے کے بعد نظر ثانی اپیل کا فیصلہ کیا جائے گا۔

عدالت عظمیٰ کے فیصلے کے حوالے سے پی ٹی آئی رہنما نے مزید کہا کہ ‘میں مریم نواز اور نواز شریف کو خصوصی پیغام دینا چاہتا ہوں کہ یہ وہی سپریم کورٹ ہے، جس کے لیے آپ لوگ تضحیک آمیز باتیں کرتے ہیں، لیکن آج عدلیہ نے ان کا وزیر خارجہ بحال کردیا ہے۔