اسلام آباد: چینی کی گاڑیاں بنانے والی کمپنی اپنا پلانٹ پاکستان میں بھی لگانے جارہی ہے جس کی افتتاحی تقریب آج وزیراعظم کے آفس میں ہوئی جہاں عمران خان نے خطاب کرتے ہوئے کہا کہ جوائنٹ وینچر سے 45 ہزار نوکریاں پیدا ہوں گی۔

تقریب سے خطاب کرتے ہوئے عمران خان کا کہناتھا کہ چین پاکستان میں 9 ملین ڈالر کی سرمایہ کاری کر رہاہے اور چین کے ساتھ مقامی سرمایہ کاروں کے اشتراک کا خیر مقدم کر تے ہیں ۔ انہوں نے کہا کہ اب پاکستان میں باقاعدہ مکمل گاڑیاں تیار ہوں گی ، پاکستان میں سرمایہ کاری کرنے والوں کو بہترین سہولتیں فراہم کریں گے ۔ ان کا کہناتھا کہ یہ پاکستان میں مکمل کارسازی کا پہلا منصوبہ ہے۔

وزیراعظم کا کہنا تھا کہ ہم نے چین سے قرض کے بجائے ٹیکنالوجی ٹرانسفر کا مطالبہ کیا، ہم پاکستان میں ایسی سرمایہ کاری چاہتے ہیں جس میں ٹیکنالوجی ٹرانسفر ہو تاکہ لوگ ہنرمند ہوں۔ ان کا کہناتھا کہ پاکستان میں بہت صلاحیت موجود ہے، بیرون ملک لوگ پاکستان میں سرمایہ کاری کے خواہشمند ہیں، یہاں بننے والی گاڑیاں اگر ایکسپورٹ ہوئیں تو مزید ڈالرز آئیں گے۔وزیراعظم کا کہنا تھا کہ ہر سال 10 ارب ڈالرز کی منی لانڈرنگ ہورہی ہے، ہم منی لانڈرنگ ، ہنڈی اور حوالہ روکنے کی کوشش کررہے ہیں اور ہمارا روپیہ جلد مضبوط ہوگا اور ہمیں ڈالرز کی کمی نہیں ہوگی۔