وزیراعظم کا اعظم سواتی کا استعفیٰ مہینہ لٹکانے سے ان کی کرپشن سے نفرت عیاں ہوگئی ، قیصر ملک

برلن (نمائندہ خصوصی) پیپلز پارٹی جرمنی کے سینئر راہنما قیصر ملک نے کہا ہے کہ علیمہ خان، جہانگیر ترین کے کیس چل رہے ہیں اور انتہائی سست رفتاری سے چل رہے ہیں، جبکہ اعظم سواتی ثابت شدہ کریمنل اور چور ہیں مگر ان کا ایک ماہ استعفیٰ لٹکا کر این آر او مانگنا حکومت کی نیت ظاہر کرگیا ہے۔ انہوں نےامریکہ میں بھی علیمہ خان کی جائیداد کا راز فاش ہونے پر تبصرہ کرتے ہوئے کہا ہے کہ علیمہ خان کا نہ کوئی کاروبار ہے اور نہ ہی انہوں نے کوئی محنت مزدوری کی ماجرا کیا ہے کہ ہر ملک میں ان کی پراپرٹی نکل آتی ہے۔

ایک بیان میں انہوں نے کہا کہ لوگ غریب مریضوں کے علاج اور غریب بچوں کی تعلیم کے لئے عمران خان کو پیسے دیتے تھے، املاک خریدنے کے لئے نہیں۔صدقہ اور خیرات کی رقم غریبوں کی امانت تھی جس پر عمران خان اور ان کی ہمشیرہ نے ڈاکہ ڈالا ہے اور لوگوں کے اعتماد کو ٹھیس پہنچائی ہے۔  انصاف کا تقاضہ یہ ہے کہ علیمہ خان کے خلاف بھی جے آئی ٹی تشکیل دی جائے اس جے آئی ٹی میں پارلیمان میں موجود سیاسی پارٹیوں کے نمائندے بھی شامل کئے جائیں۔

کیونکہ قوم کا عمران خان کے ماتحت اداروں پر پورا یقین نہیں ہے۔

انہوں نے کہا کہ جے آئی ٹی عمران خان اور علیمہ خان کے خلاف بھی تحقیقات کرے۔ تحقیقات تک علیمہ خان کو ای سی ایل پر رکھا جائے۔ انہوں نے کہا کہ یہ ٹھیک ہے کہ علیمہ خان کے پاس کوئی سرکاری عہدہ نہیں تھا تاہم وہ ٹرسٹ کی ڈائریکٹر ضرور ہیں۔ ان کے پاس چندہ جمع کرنے اور خرچ کرنے کا اختیار تھا یہی وجہ ہے کہ انہوں نے عوام کی دی ہوئی رقم کو دونوں ہاتھوں سے لوٹ کر بیرون ملک جائیداد بنائی۔ اس چوری کی واردات میں عمران خان بھی برابر کے شریک ہیں اس لئے عمران خان کا نام بھی ای سی ایل میں رکھا جائے۔