لاہور: پاکستان مسلم لیگ ن کی نائب صدر اور سابق وزیر اعظم نواز شریف کی صاحبزادی مریم نواز نے کہا ہے کہ نالائق اعظم اور اسکی جعلی حکومت جو مرضی کر لے، مسلم لیگ ن ہر صورت عوام کی آواز بنے گی۔
مریم نواز نے اپوزیشن لیڈر پنجاب اسمبلی حمزہ شہباز کی گرفتای پر اپنے ردعمل میں کہا کہ جیلیں نہ حمزہ شہباز کے لئے نئی ہیں اور نہ ہی مسلم لیگ (ن) کے لئے نئی، ہم نے ڈکٹیٹر کے مظالم کا مقابلہ کیا ہوا ہے، یہ ٹوٹی پھوٹی، جعلی اور آخری سانسیں لیتی حکومت تو ہے ہی ریت کی دیوار! سماجی رابطے کی ویب سائٹ ٹوئٹر پر جاری اپنے پیغام میں مریم نواز نے کہا کہ کٹھ پتلی وزیراعظم کے اشاروں پر ناچنے والا نیب ظلم و ناانصافی کی ساری حدیں پار کر چکا ہے۔ ایسا کرنے والے نہ پہلے تاریخ کے قہر سے بچیں ہیں نہ اب بچیں گے۔ حمزہ! سر بلند ہو کے رہنا۔۔ کٹھ پتلی تماشا ختم ہونے کو ہے۔ انشاء اللہ! نائب صدر مسلم لیگ ن مریم نواز نے کہا کہ معاشی سروے اور بجٹ جیسی تاریخی ناکامیوں سے توجہ ہٹانے کے لیئے گرفتاریاں تمہیں عوام کے غیض و غضب سے نہیں بچا سکتیں ۔ گرتی ہوئی دیواروں کو گرفتاریوں سے نہیں بچایا جا سکتا۔انہوں نے کہا کہ جس حکومت میں پوری قوم قید کی کیفیت میں ہو، اس حکومت میں اپوزیشن کی گرفتاریوں سے نالائق اعظم خود کو نہیں بچا سکتا۔
مریم نواز شریف نے ٹوئٹر پر حمزہ شہباز کا ایک وڈیو کلپ بھی ’شاباش حمزہ ‘ کی ٹیگ لائن کے ساتھ شئیر کیا ہے جس میں وہ ذرائع ابلاغ کے نمائندوں سے گفتگو کررہے ہیں۔ مریم نواز نے گزشتہ روز آصف زرداری کی گرفتاری پر بھی سماجی رابطے کی ویب سائٹ ٹوئٹر پر بیان جاری کیا تھا۔انہوں نے کہا تھا کہ قانون سب کے لیے برابر اور احتساب غیر جانبدارنہ ہوتا تو چور دروازے سے آیا جعلی اعظم اپنا اور اپنی بہن کا حساب دینے کے لیئے آج کٹہرے میں ہوتا۔
