علاج کیلئے عدالت، انصاف کیلئے جیل، حقوق اورغلط معاشی پالیسیوں سے نجات کیلئے چیف کے پاس جائیں تو حکومت کس مرض کی دوا ہے، چوہدری سجاد احمد

پیرس/اسلام آباد(ایس ایم حسنین) پاکستان مسلم لیگ ن یوتھ ونگ فرانس کے جنرل سیکرٹری چوہدری سجاد احمد نے حکومت کو آڑھے ہاتھوں لیتے ہوئے کہا ہے کہ تین مرتبہ قائد ایوان رہنے والے سابق وزیراعظم میاں محمد نواز شریف کو شدید علالت میں بھی جو جمہوریت حکومت علاج معالجہ کیلئے سہولت نہ دے سکی اس سے عوام کیلئے کسی بھی قسم کی سہولت کی توقع عبث ہے۔

ان کا کہنا تھا کہ اب عوام کو علاج معالجہ کیلئے عدالتوں میں جاناپڑا کریگا اور حصول انصاف کیلئے جیلوں اورنیب میں دھکے کھانے پڑینگے، جبکہ بنیادی حقوق اورحکومتی معاشی پالیسیوں سے نجات حاصل کرنی ہوتو تاجر تنظیمیں آرمی چیف کے پاس جارہی ہیں ایسی حکومت نہ تو کبھی تاریخ میں کسی نے دیکھی نہ سنی۔ عوام کو تبدیلی کے نام پر ایک نام نہاد وزیراعظم ملا جو کرپشن کیخلاف مہم شروع کرتا ہے تو سب سے زیادہ اپنےاردگرد کرپٹ نکل آتے ہیں، قرضوں پرکمیشن بناتا ہے تو اس میں سابقہ حکومتیں مکمل طور پر بے قصور ثابت ہوتی ہیں۔ ایسی برائے نام حکومت مزید رہی تو ملک سالوں پیچھے چلا جائیگا اور سنبھالنا کسی کے بس میں نہیں رہیگا۔