Funeral Prayers

کراچی (یس ڈیسک) کراچی کے علاقے گلبہار میں گزشتہ روز فائرنگ سے جاں بحق ہونے والے ایم کیو ایم کے کارکنان محمد اشرف اور عبدالرحمن کی نماز جنازہ گلبہار میں ادا کی گئی۔

نماز جنازہ میں ایم کیو ایم رابطہ کمیٹی کے رکن ڈاکٹر خالد مقبول صدیقی، عامر خان اور دیگر رہنماوں سمیت مقتولین کے لواحقین اور کارکنان نے بڑی تعداد میں شرکت کی۔

اس موقع پر میڈیا سے بات چیت کرتے ہوئے ایم کیو ایم کے رہنما ڈاکٹر خالد مقبول صدیقی کا کہنا تھا کہ کراچی کے عوام کے صبر کا پیمانہ لبیز ہو چکا ہے۔ سندھ میں حکومت نام کی کوئی چیز نہیں ہے۔ ایم کیو ایم کے کارکنوں کو بےدردی سے قتل کیا جا رہا ہے۔

حکومت کو منافقت سے نکلنا چاہیے یہ وقت فیصلے کا وقت ہے اور دہشتگردوں اور ان کے ساتھیوں کیخلاف کارروائی کا وقت آ گیا ہے۔ نماز جنازہ کے موقع پر گلبہار میں دکانیں اور کاروباری مراکز بند رہے۔ مقتولین کو نماز جنازہ کی ادائیگی کے بعد مقامی قبرستان میں سپرد خاک کر دیا گیا۔