Julie Bishop And Sartaj Aziz

اسلام آباد : آسٹریلیا نے پاکستان کے سرحدی علاقوں کی بہتری اور سرمایہ کاری کیلئے ایک کروڑ ننانوے لاکھ ڈالر امداد کا اعلان کر دیا ، آسٹریلوی وزیر خارجہ جولی بشپ کہتی ہیں داعش عالمی امن کیلئے خطرہ ہیں۔

آسٹریلوی وزیر خارجہ جولی بشپ نے مشیر خارجہ سرتاج عزیز سے ملاقات میں پاکستان کیلئے ایک کروڑ ننانوے لاکھ آسٹریلین ڈالرامداد کا اعلان کیا ۔ امداد سرحدی علاقوں کی بہتری اور سرمایہ کاری کیلئے دی گئی ہے ۔ ایک کروڑ ڈالر سرحدی علاقوں کے انفراسٹرکچر کی بحالی پر خرچ ہوں گے۔ مشترکہ نیوز کانفرنس میں سرتاج عزیز نے دوںوں ملکوں کے درمیان عوامی رابطوں کو مضبوط بنانے کی ضرورت پر زور دیا۔ انہوں نے کہا کہ تجارتی اور معاشی روابط کی مضبوطی پر اتفاق ہوا ہے۔

لائیو سٹاک اور واٹر ریسورس مینجمنٹ کے شعبوں میں مل کر کام کریں گے۔ آسٹریلوی وزیر خارجہ نے دہشت گردی کے خلاف جنگ میں تعاون کا یقین دلایا۔ انہوں نے کہا کہ داعش اور ایسی دیگر تنظیمیں عالمی امن کیلئے خطرہ ہیں۔ آسٹریلیا بھی دہشت گردی کے خطرے سے پاک نہیں۔ شام اور عراق میں دہشت گرد تنظیمیں کام کر رہی ہیں۔

رپورٹ کے مطابق سو سے زائد دہشت گرد آسڑیلیا سے شام اور عراق کے دہشت گردوں کی مدد کیلئے گئے۔ انہوں نے کہا کہ پارلیمنٹرین کے دو طرفہ دوروں سے باہمی تعلقات کو فروغ ملے گا۔ بارڈر منیجمنٹ کیلئے پاکستان اور افغانستان کو مل کر کام کرنا ہوگا۔ جولی بشپ نے پاکستان اور بھارت کو مسئلہ کشمیر باہمی طور پر حل کرنے کا مشورہ دیا۔