All private schools

اسلام آباد……پنجاب کے تمام اور اسلام آباد کے نجی اسکولز بندہوگئے، ملک بھر کے فیڈرل گیریژنز، بحریہ اور آرمی پبلک اسکولوں میں بھی چھٹیاںدے دی گئیں، ناقص سیکورٹی انتظامات پر کئی شہروں کے تعلیمی ادارے سیل کردیئے گئے۔
راولپنڈی میں سیکیورٹی گارڈز سمیت عملے کو اسلحہ چلانے کی تربیت دینے ،جامعہ کراچی کی دیواریں بلند کرنے، واک تھرو گیٹ لگانے اور ریٹائرڈ فوجی بھرتی کرنے کا فیصلہ کیا گیا ہے۔ملک بھر میں آرمی پبلک اسکول، کالجز اور کینٹ اینڈ گریژن میں ایف جی ایجوکیشنل ڈائریکٹوریٹ کے زیرانتظام تمام تعلیمی ادارے بند کر دیے گئے۔حکومت پنجاب نے سردی کی اضافی تعطیلات کا اعلان کیا تو صوبے بھر میں تمام سرکاری اور نجی تعلیمی اداروں کو بند کردیا گیا، تاہم پاک فوج کے زیر انتظام اسکول اور کالجز کھلے رہے۔ذرائع کے مطابق آج ملک بھر میں آرمی پبلک اسکولز اور کالجز کو 31 جنوری تک بند کر دیا گیا ہے، اس کے علاوہ کینٹ اور گیریژن میں فیڈرل گورنمنٹ ایجوکیشنل انسٹیٹیوٹ کے زیر انتظام چلنے والے تعلیمی اداروں میں بھی چھٹیوں کا اعلان کر دیا گیا ہے۔ذرائع کا کہنا ہے کہ ان اسکولوں کو دہشت گرد حملے کے خدشات کے باعث بند کیا گیا ہے، تاہم راولپنڈی کے سرکاری اسکولوں میں سیکنڈری کلاسوں کے طلبا کو امتحانات کی تیاری کے لیے روزانہ تین گھنٹے کے لیے بلایا جا رہا ہے جبکہ وفاقی دارالحکومت میں تمام نجی اور سرکاری تعلیمی ادارے کھلے رہیں گے۔