Lollywood actress

اداکارہ نے ماڈلنگ سے کیریئر کا آغاز کیا ، سید نور کی فلم “سنگم ” کیریئر کی پہلی فلم ثابت ہوئی لاہور (یس اُردو ) لالی ووڈ کی نامور اداکارہ ثنا آج اپنی 37 ویں سالگرہ منائیں گی ۔ اداکارہ ثنا کا تعلق ملتان سے ہے ، انہوں نے کیریئر کا آغاز کھانسی کے ایک شربت کے کمرشل سے کیا اور “فشوں گرل ” کے نام سے مشہور ہوئیں ، ان کے کیریئر میں پہلا بڑا موڑ اس وقت آیا جب ہدایت کار سید نور نے انہیں اپنی فلم “سنگم ” کے ایک اہم کردار میں سائن کیا ۔ اس کے بعد ثنا نے کئی اور فلموں میں کام کیا جس میں ریشماں ، گھر کب آئو گے ، چوڑیاں ، یہ دل آپ کا ہوا ، کھلے آسماں کے نیچے زہر عشق جیسی فلمیں شامل تھیں ، اداکارہ ثنا نے پاکستان کے علاوہ بالی ووڈ کی فلموں میں بھی کام کیا جس میں اداکار سنی دیول کے ساتھ ان کی فلم “قافلہ ” قابل ذکر ہے ، اداکارہ ثنا کا تعلق ایک آرٹسٹ خاندان سے ہے ، ان کی بڑی بہن اداکارہ فرزانہ تھیہم بھی ٹی وی ڈراموں میں کام کرتی رہی ہیں ، ان کی کزن نور بھی ٹی وی میزبان ، ماڈل ، اداکارہ اور فلموں میں اہم کردار ادا کرتی رہی ہیں ۔ اداکارہ ثنا نے شان ، معمر رانا ، بابر علی ، ریمبو اور دیگر نامور اداکاروں کے ساتھ کام کیا ہے ۔ ثنا نے اداکار فخر امام کے ساتھ محبت کی شادی کی تھی جو ان دنوں فلموں میں کام کر رہے ہیں ۔