گورنر اسٹیٹ بینک اشرف وتھرا نے کہا ہے کہ افغانستان سےکھلی تجارت ہمارے لیے بڑا مسئلہ ہے،افغانستان میں بینکنگ کانظام نہیں تھا ، افغانستان میں سہولتیں دیں جو اب گلے پڑگئی ہیں۔

لاہور چیمبر آف کامرس سے خطاب میں گورنر اسٹیٹ بینک نے کہا کہ منی لانڈرنگ پر قابو پانے کی کوشش کر رہے ہیں،کوئی نئی قانون سازی کی تو تاجر ہی شور مچائیں گے ،پاکستا ن میں کوئی ٹیکس دینے کو تیار نہیں تنقید سب کرتے ہیں ،غیر ضروری اشیا کی درآمد سے خسارہ بڑھا رہا ہے ،اس کو روکنا دیگر اداروں کا کام ہے ۔اس موقع پر انہوں نے لاہور چیمبر کے تاجروں سے ملاقات بھی کی ،تاجروں نے بینکوں کے ناروا سلوک ،سیلز ٹیکس ری فنڈ میں تاخیر کی شکایات کے انبار لگا دئیے ۔اشرف وتھرا کا کہنا تھا کہ جو ایف بی آر ،وزارت تجارت اور دیگر اداروں کے کرنے کے کام ہیں اس کا ذمہ دار بھی اسٹیٹ بینک کو ٹھہرادیا جاتا ہے ، منی لانڈرنگ کو روکنے کے لئے کئی قدم اٹھائے ہیں ،ہمارا جی ڈی پی ریشو 11 فیصد کی کم ترین سطح پر جو افسوسناک ہے لوگوں کو ٹیکس دینا چاہیے ۔