واشنگٹن : ایک نہیں دو نہیں تین نہیں پوری بارہ خواتین نے ڈونلڈ ٹرمپ پر جنسی سکینڈل کا الزام لگا دیا ہے ۔ سابق مس فن لینڈ بھی میدان میں اتری ہیں اور ٹرمپ صاحب کو اُن کا ماضی یاد دلا دیا ہے ، کہتی ہیں ٹرمپ نے فوٹو شوٹ کےد وران نازیبا جملے کہے ۔ امریکی صدارتی انتخابات میں صرف 11 روز باقی ہیں کہ ڈونلڈ ٹرمپ کا آوارہ مزاج ماضی ان کے صدر بننے کی راہ میں رکاوٹ بننے لگا ۔ ایک کے بعد ایک خاتون اور گنتی جا پہنچی بارہ پہ ، یعنی اب تک ایک درجن خواتین نے ڈونلڈ ٹرمپ کی پلے بوائے طبعیت کی تصدیق کر دی ہے ۔ سابق مس فن لینڈ ڈونلڈ ٹرمپ کی آوارہ مزاجی کا نشانہ بننے والی بارہویں خاتون ہیں ۔ 30 سالہ نینی لیکسونن کا کہنا ہے کہ 2006 میں مس یونیورس کے مقابلے میں فوٹو شوٹ کے دوران ڈونلڈ ٹرمپ نے انہیں ہراساں کیا ۔ ڈونلڈ ٹرمپ نے انہیں پیغام بھی بھیجا کہ وہ ان کی اہلیہ میلینیا جیسی لگتی ہیں جب وہ جوان تھیں ۔ اس سے پہلے اداکارہ جیسیکا ڈریک اور سلمیٰ ہائیک سمیت گیارہ خواتین ٹرمپ پر جنسی ہراساں کرنے کا الزام لگا چکی ہیں ۔