ڈرون ٹیکنالوجی نے اپنی بڑھتی ہوئی افادیت دوبارہ ثابت کردی اور صرف ایک ڈرون نے 500 سے زائد ملزمان کو گرفتار کرانے میں مدد دی ہے۔

میکسیکو کے شہر اینسیناڈا میں پولیس نے ایمرجنسی کال کے بعد ڈی جے آئی ڈرون استعمال کرتے ہوئے نہ صرف وارداتوں پر قابو پایا بلکہ اس سے سیکڑوں مجرموں کی گرفتاری کا دعویٰ بھی کیا ہے۔

سٹی پولیس کے مطابق صرف ایک ڈی جے آئی انسپائرون کواڈ کاپٹر سے جرائم میں 10 فیصد کمی ہوئی ہے کیونکہ اس علاقے میں گھروں میں چوریوں کی بے تحاشا وارداتیں ہوتی تھیں جن کا گراف اب کم ہوچکا ہے۔ میکسیکو میں اینسیناڈا پولیس چیف جیسس راموس نے کہا ہے کہ ڈرون کی وجہ سے پولیس کے ردِعمل کا وقت کم ہوا ہے اور مجرموں کو پکڑنے میں آسانی ہوئی ہے۔

چار ماہ تک ڈرون نے روزانہ 25 مشن انجام دیئے اور یہ مشن 911 امدادی کالزکے جواب میں کیے گئے تھے۔ جی پی ایس سے لیس اس ڈرون کا سافٹ ویئر کیلی فورنیا کی ایک کمپنی نے بنایا ہے جو خودکار انداز میں ڈرون کو اس جگہ تک پہنچاتا ہے اور اس دوران پورے عمل کی ویڈیو نشر ہوتی رہتی ہے۔

میکسیکو پولیس کے مطابق کئی بار ایسا ہوا کہ ڈرون صرف چند منٹوں میں جائے واردات پر پہنچا اور فرار ہوتے ملزمان کی ویڈیو براہِ راست نشر کردی جس کے بعد پولیس نے انہیں آسانی سے ڈھونڈ نکالا۔

میکسیکو پولیس کے مطابق چور اور ڈاکوؤں کے ذہن میں اپنی واردات اور پولیس کے پہنچنے کا ایک خاص دورانیہ ہوتا ہے اور وہ اسی وقفے میں اپنا کام کرتے ہیں لیکن ڈرون پہنچنے سے وہ فرار ہوجاتے ہیں یا پھر ان کی ویڈیو بننے سے انہیں گرفتار کرلیا جاتا ہے۔

اینسیناڈا کی آبادی 5 لاکھ 22 ہزار افراد پر مشتمل ہے اور پولیس کے مطابق ایک درجن ڈرون اس شہر کی مکمل چوکیداری کرسکتے ہیں۔ یہ ڈرون بہت تیزی سے کسی جائے واردات پر پہنچتے ہیں کیونکہ پولیس فوری طور پر وہاں نہیں پہنچ پاتی۔ اس طرح فوری طور پرڈرون کی مداخلت سے جرائم کو روکنے میں مدد ملتی ہے۔