مریم نواز کی جعلی ویڈیو سیاست نے شریف خاندان کی سیاسی قبر کھود دی ہے، جس میں جلد دفن ہوجائیگی، ابرارکیانی

پیرس؍اسلام آباد( ایس ایم حسنین) پاکستان تحریک انصاف فرانس کے سینئر راہنما ابرارکیانی نے کہا ہے کہ مریم نواز کی جعلی ویڈیو سیاست نے شریف خاندان کیلئے سیاسی قبر کھود دی ہے۔ جس میں جلد دفن ہوجائیگی۔

انہوں نے کہا کہ اگر پانامہ رانی نے ا لٹے سیدھے انٹرویوز اور بیانات نہ دیے ہوتے تو آج کرپٹ شہزادی کے ابوجیل اور بھائی مفرور نہ ہوتے۔ انہوں نے کہا کہ پاکستان کے عوام عام انتخابات میں کرپشن کے خلاف نکلے، انہوں نے کرپشن اور لوٹ مار کے خلاف بغاوت کرتے ہوئے عمران خان کو لٹیروں سے حساب لینے کا مینڈیٹ دیا،جمہوریت کو لہو لہان کرنے کا سہرا ہمیشہ آپ کے سر رہا ،ورثے میں ملی حیثیت عوامی رنگ اور طاقت سے محروم ہوتی ہے۔

انہوں نے کہا کہ مریم صفدرکے نزدیک وہ آواز آزاد ہے جو ان کے مفاد میں ہو،ایک اخبار کا ایک صفحے پر چھپنا قارئین کے ذہن میں ابھی تک تازہ ہے۔انہوں نے کہا کہ دراصل ملک میں پہلی بار طاقتور طبقے پر ہاتھ ڈالا جارہا ہے اور ان کی جعل سازی کو بے نقاب کر کے انھیں ناکام کیا جارہا ہے۔ ۔ انھوں نے کہا کہ قانون کا سب پر یکساں اطلاق شروع ہو چکا ہے،لوٹے ہوئے مال کی واپسی کا خواب حقیقت بن رہا ہے۔ کبھی لوٹا ہو ا مال کسی نے واپس نہیں کیا مگر اب واپس کرنا پڑ رہا ہے یہی تکلیف انہیں کھائے جار رہی ہے۔