اسلام آباد(ایس ایم حسنین)متحدہ عرب امارات میں 20 جنوری کو نامزد کیے جانے والے سینئر پاکستانی سفارتکار افضال احمد نے ابوظہبی میں پاکستانی سفارتخانے میں ذمہ داریاں سنبھال لی ہیں۔ انھیں حال ہی میں بحرین میں اپنی سفارتی ذمہ داریاں مکمل کرنے کے بعد نئی ذمہ داریاں تفویض کی گئی تھیں۔ انھیں سفیر غلام دستگیر کی جگہ تعینات کیا گیا جو پچھلے سال اگست میں ریٹائرمنٹ کے بعد وطن واپس پہنچ گئے تھے۔ امارات کی سرکاری خبر رساں ایجنسی نے پاکستانی سفارت خانے کی جانب سے جاری تفصیلات کے حوالے سے بتایا ہے کہ افضال محمود وسیع سفارتی تجربہ رکھتے ہیں اور دنیا کے مختلف ممالک اور بین الاقوامی فورمز پر پاکستان کی نما ئندگی کرچکے ہیں۔ قابل ذکرسفارتی ذمہ داریوں میں 2013 سے 2016 تک ہوسٹن میں پاکستانی قونصل جنرل رہنا بھی شامل ہے۔ اس سے قبل وہ بنگلہ دیش میں 2009 سے 2013 تک پاکستان کے نائب و قائمقام ہائی کمشنر بھی رہ چکے ہیں۔ انہوں نے 2004 سے 2007 تک اقوام متحدہ کے ماحولیاتی پروگرام اور انسانی آباد کاری پروگرام میں پاکستان کی نمائندگی بھی کی ہے۔ ان کی دیگر سرکاری ذمہ داریوں میں آسیان، سارک، انڈونیشیا، مشرقی افریقہ، بنگلہ دیش اور جرمنی میں موسمیاتی تبدیلیوں کے حوالے سے اجلاسوں میں نمائندگی شامل ہے۔ وزارت خارجہ اسلام آباد میں تعیناتی کے دوران انہوں نے مختلف ذمہ داریاں سرانجام دیں۔ ان میں ڈی جی امریکہ و یورپ، ڈائریکٹر، ڈپٹی ڈائریکٹر اور اسسٹننٹ ڈائریکٹر برائے ایران، ترکی، یورپ و جنوبی ایشیا شامل ہیں۔ افضال محمود نے گورنمنٹ پوسٹ گریجویٹ کالج چکوال پنجاب سے اکنامکس میں ڈگری حاصل کر رکھی ہے جبکہ ترکی کی انقرہ یونیورسٹی سے وہ ترک زبان کی تعلیم بھی حاصل کرچکے ہیں۔ اردو، انگریزی، پنجابی کے علاوہ انڈونیشین اور ترک زبان پر عبور رکھتے ہیں۔