لندن(نیوز ڈیسک ) قومی کرکٹ ٹیم کے بلے باز بابر اعظم نے پاکستان کی جانب سے ورلڈکپ میں سب سے زیادہ رنز بنانے کا جاوید میانداد کا 27 سال پرانا ریکارڈ توڑ دیا۔قومی ٹیم کے سابق کپتان جاوید میانداد نے 1992 ءکے ورلڈ کپ میں پاکستان کی جانب سے 9 اننگز میں 5 نصف سنچریوں کی مدد سے 437 رنز بنائے تھے ۔بابراعظم نے پاکستان کی جانب سے سب سے زیادہ رنز بنانے کا کارنامہ ورلڈکپ 2019 ءکے 43 ویں میچ میں بنگلا دیش کے خلاف انجام دیا۔24 سالہ بابراعظم پاکستان کی جانب سے ورلڈکپ میں 400 سے زائد رنز بنانے والے دوسرے کھلاڑی ہیں۔اس کے علاوہ بابراعظم نے رواں ورلڈکپ کے دوران ہی سب سے تیز ترین 3000 رنز بنانے والے ایشین اور مجموعی طور پر دوسرا کھلاڑی کا اعزاز بھی حاصل کیا تھا،بابراعظم نے بنگلا دیش کے خلاف میچ میں 96 رنز کی اننگز کھیلی اور اس طرح انہوں نے 8 میچوں کی 8 اننگز میں67.71کی اوسط سے 474 رنز سکور کیے جن میں ایک سنچری اور 3نصف سنچریاں شامل تھیں۔ قومی ٹیم کے سابق اوپنر سعیدا نور نے 1999ءکے ورلڈ کپ میں368رنز سکور کیے تھے ،سابق قومی کپتان مصباح الحق نے ورلڈ کپ2015ءمیں 350رنز سکور کیے تھے جب کہ سابق قومی اوپنر رمیز راجہ نے 1987ءاور1992ءکے ورلڈ کپس میں 349،349رنز سکور کیے تھے ۔