پاکستان میں انٹر نیشنل کرکٹ کے دروازے کھلتے ہی بکیز نے بھی تجوریوں کے منہ کھول دیئے۔ آزادی کپ کے حوالے سے ورلڈ الیون اور گرین شرٹس کے درمیان تین ٹی ٹوئنٹی میچز پر اب تک ڈیڑھ ارب روپے لگائے جا چکے ہیں۔ بکیز نے فیصل آباد کے تھری اسٹار ہوٹلز میں ڈیرے ڈال لیے ہیں۔ اس کا بنیادی سبب یہ ہے کہ اس بار لاہور میں غیر معمولی سیکیورٹی ہے ۔ وہاں سٹے بازی کی زیادہ گنجائش رہی نہیں ۔ فیصل آباد عملاً جوئے کی انٹر نیشنل منڈی میں تبدیل ہوگیا ہے۔

فیصل آباد کے پوش علاقوں مدینہ ٹاؤن، مسلم ٹاؤن، گلبرگ، پیپلز کا لونی، جناح کالونی، ماڈل ٹا ؤن اور غلام محمد آباد میں جگہ جگہ جوئے کے اڈے بن گئے ہیں۔ ریٹ ففٹی ففٹی چل رہا ہے۔ میچز شروع ہونے پر ریٹ میں اتار چڑھاؤ آئے گا ۔ چند بھارتی جواری بھی پاکستان پہنچے ہیں۔ ان کی رہائش کو خفیہ رکھا جا رہا ہے ۔ بھارت سے آنے والے بکیز کے فیصل آباد کے برآمدی تاجروں سے تعلقات ہیں۔