Shahid Afridi

کولمبو : ٹی ٹوئنٹی کپتان شاہد آفریدی پر توقعات کا بوجھ بڑھ گیا، مصباح الحق اور اظہر علی کی سیریز فتوحات کے بعد آل راؤنڈر کو دونوں میچز میں کامیابی حاصل کرنے کا چیلنج درپیش ہوگا، اپنی کھوئی ہوئی فارم واپس لانے کی فکر بھی لاحق ہوگی۔

تفصیلات کے مطابق دورہ سری لنکا میں اب تک پاکستان کرکٹ ٹیم کا پلڑا بھاری رہا ہے، مصباح الحق کی قیادت میں مہمان ٹیسٹ ٹیم نے کامیابی حاصل کی، بعدازاں گرین شرٹس اظہر علی کی کپتانی میں ون ڈے سیریز میں سرخرو ہوئے۔

اب ٹی ٹوئنٹی قائد شاہد آفریدی پر توقعات کا بوجھ بڑھ گیا ہے، اہم بات یہ بھی ہے کہ ٹیسٹ اور ون ڈے کپتان دونوں اچھی فارم میں تھے لیکن مختصر فارمیٹ میں قیادت سنبھالنے والے آل راؤنڈرکی کارکردگی اچھی نہیں جارہی، انھوں نے حال ہی میں کیریبیئن لیگ میں شرکت کی،تاہم کوئی قابل ذکر پرفارمنس سامنے نہیں آسکی۔

ان پر سیریز میں فتح اور ذاتی کارکردگی دونوں حوالے سے دباؤ ہوگا، پاکستان اور سری لنکا کے مابین ٹی ٹوئنٹی میچوں کی سیریز کا پہلا میچ جمعرات کو کولمبو میں، دوسرا یکم اگست کو اسی وینویو پرکھیلا جائے گا، وہاب ریاض کا خلا پرکرنے کیلیے شامل کیے گئے لیفٹ آرم فاسٹ بولرضیا الحق ڈیبیو کے منتظرہیں، ان کیساتھ نعمان انور، سہیل تنویر اور عمر اکمل نے بھی اسکواڈ کو جوائن کرلیا ہے۔

ون ڈے سیریز کا حصہ بننے والے احمد شہزاد، سرفراز احمد، شعیب ملک، محمد حفیظ، مختار احمد، محمد رضوان، عماد وسیم، یاسر شاہ، انور علی اور محمد عرفان سمیت دیگرسری لنکا ہی میں موجود ہیں،کپتان اظہر علی،اسد شفیق، بابر اعظم، راحت علی،احسان عادل اور بلال آصف وطن واپس آچکے ہیں، منگل کو مہمان ٹی ٹوئنٹی اسکواڈ نے کولمبو میں پریکٹس کی، یاد رہے کہ باہمی مقابلوں میں پاکستان کو برتری حاصل ہے ، اب تک دونوں ملکوں میں 12ٹی ٹوئنٹی انٹرنیشنل میچ کھیلے گئے ہیں جن میں پاکستان نے7 میں فتح پائی جبکہ میزبان ٹیم 5 میں کامیاب ہوئی۔