ماضی میں محترمہ شہید پردبائو کیلئے مردِ حُرآصف علی زرداری کو قید کیا جاتا رہا اب بلاول بھٹو پر دبائو کیلئے ان کو بدترین سیاسی انتقام کا نشانہ بنایا جارہا ہے، چوہدری جہانگیر نواز

اوسلو؍اسلام آباد(ایس ایم حسنین) پاکستان پیپلز پارٹی ناروے کے صدر چوہدری جہانگیر نواز نے کہا ہے کہ اسٹیبلشمنٹ نے ہمیشہ محترمہ بے نظیر بھٹو سے خائف ہوکر ان کے شوہر کو قیدوبند کی صعوبتوں سے دوچار کیا اور آج بھی وہ رویہ نہیں بدلا کٹھ پتلی حکومت کے ذریعے چیئرمین بلاول بھٹو زرداری کو دبائو میں لانے کیلئے سابق صدر آصف علی زرداری کو علاج کی مناسب سہولتیں بھی فراہم کرنے نہیں دی جارہیں۔

ان کا کہنا تھا کہ یہ بدترین موقع ہے کہ ایک نوجوان راہنما جو شہید بھٹو کا نواسہ اور محترمہ شہید کا بیٹا ہے اسے  جمہوریت کیلئے آواز بلند کرنے سے روکنے کیلئے غیر انسانی سلوک کیا جارہا ہے۔ جناب آصف علی زرداری اور محترمہ فریال تالپور کیخلاف اگر کوئی ثبوت ہیں تو انھیں عدالت میں پیش کیا جانا چاہیے مگر ایسا اب تک نہیں ہوسکا۔ اور قیدوبند میں سابق صدر آصف علی زرداری سے زیادہ اچھی طبی سہولیات لاکھوں انسانوں کے قاتل جاسوس کلبھوشن یادو کو حاصل ہیں ۔