کرپٹ سیاسی اشرافیہ سے زیادہ خطرناک انکے پلانٹڈ اہلکار ہیں، حکومت میجر سرجری کیلئے تیار، چوہدری سلیم بوڑا

پیرس (نمائندہ خصوصی) پاکستان تحریک انصاف فرانس کے سینئر راہنما چوہدری سلیم بوڑا نے معاشی ٹیم میں مزید ردوبدل کے حکومتی فیصلے کی حمایت کرتے ہوئے کہا ہے کہ کرپٹ سیاسی مافیا سے بھی زیادہ خطرناک ان کے پلانٹ کیے گئے کرپٹ اہلکار ہیں ۔ جو کہ ہر لحظہ اور ہرلمحہ حکومت کی آگے بڑھتی سوچ کو پیچھے دھکیلنے میں مصروف ہیں ۔ ان بیماریوں کی میجر سرجری کی ضرورت ہے۔

انہوں نے کہا کہ پی آئی اے کو منافع بخش بنانے کے لئےاقدامات قابل تحسین ہیں، حکومت کی دانشمندانہ پالیسیوں اور فیصلوں کو مدنظر رکھتے ہوئےبین الاقوامی ایئرلائنز جو پہلے ہچکچاتی تھیں اب اپنے آپریشن بحال کر رہی ہیں، احتساب کا عمل جاری رہے گا اور اس میں کوئی رکاوٹ نہیں آئے گی ۔

وہ جمعہ کو پیرس میں صحافیوں سے گفتگو کر رہے تھے۔ انہوں نے کہا کہ وفاقی کابینہ میں ردوبدل سے ملکی سٹاک ایکسچینج اورڈالر ریٹ میں کمی سے مالی پوزیشن میں بتدریج بہتری آرہی ہے۔

انہوں نے کہا کہ حکومتی اقدامات کی بدولت معیشت مثبت سمت میں آگے بڑھ رہی ہے،  انہوں نے کہا کہ 11 سال کی بندش کے بعد برٹش ایئر ویز لندن اور اسلام آباد کے درمیان دوبارہ پروازیں شروع کر رہی ہے جس سے برطانوی اوراوورسیز پاکستانی شہری دونوں اس بہترین سروس سے مستفید ہو سکیں گے۔

انہوں نے کہا کہ موجودہ معاشی بحران کی ذمہ دار پی ٹی آئی نہیں بلکہ گزشتہ 35 سالوں سے حکمرانی کرنے والے کرپٹ سیاستدان ہیں، جنہوں نے بے دردری سے اس ملک کے خزانے کو لوٹا ہے۔ انہوں نے کہا کہ موجودہ احتساب کا عمل اسی طرح جاری رہے گا، اس میں کوئی رکاوٹ نہیں آئے گی اور تمام سازشیں دم توڑ جائیں گی