وزیراعلیٰ سندھ سید مراد علی شاہ نے کراچی کا اچانک دورہ کیا اور شہر میں جاری ترقیاتی منصوبوں جائز ہ لیا۔ وزیراعلیٰ سندھ کا کہنا تھا کہ عوام سڑکوں کی تعمیر کی وجہ سے شدید مشکلات میں ہیں۔جولائی میں یونیورسٹی سے صفورا گوٹھ تک سڑک مکمل کی جائے۔

وزیراعلیٰ سندھ سید مراد علی شاہ نے چھٹی کے روز کو بھی کام کا دن بنایا اور صبح سویرے بغیر پروٹوکول کے وزیربلدیات سندھ جام خان شورو کے ہمراہ شہر میں جاری ترقیاتی کاموں کا جائزہ لینے کیلئے نکل پڑے ۔مراد علی شاہ پہلے طارق روڈ پہنچے اور وہاں زیر تعمیر روڈ کا معائنہ کرتے ہوئے کام کی تفصیلات معلوم کیں پھر وزیراعلیٰ حسن اسکوائر پہنچ گئے۔ اس موقع پر وزیراعلیٰ سندھ نے پلاننگ اینڈ ڈیولپمنٹ ڈپارٹمنٹ کو کام تیز کرنے کی ہدایات کی ۔وزیراعلیٰ سندھ نے وفاقی اردو یونیورسٹی گلشن اقبال کے سامنے بھی جاری کام کا معائنہ کیا۔مراد علی شاہ کا کہنا تھاکہ کراچی یونیورسٹی سے صفورا چورنگی تک روڈ کی خراب حالت میں ہے اور اس کی تعمیر میں پانی کی نکاسی کے لیے پائپ بھی صحیح طریقے سے لگنے چاہئیں۔ ان کا کہنا تھاکہ جولائی تک یونیورسٹی سے صفورا تک سڑک مکمل چاہیے۔

وزیراعلیٰ سندھ نے ناردرن بائی پاس کا بھی دورہ کیا اور ترقیاتی کام کا جائزہ لیا۔