تہران: ایران نے اپنے شہریوں کی حج میں شرکت کے معاملے پر سعودی عرب کے ساتھ جاری مذاکرات میں پیش رفت کا عندیہ دے دیا۔

خیال رہے کہ گذشتہ سال دونوں ممالک کے درمیان کشیدہ سفارتی تعلقات اور سیکیورٹی اقدامات پر اتفاق نہ ہونے کے سبب ایرانی شہری حج کا مقدس فریضہ سرانجام نہیں دے پائے تھے۔

 اخبار کی رپورٹ کے مطابق ایران کے سرکاری خبر رساں ادارے نے امور حج میں ایرانی سپریم لیڈر سید علی آیت اللہ خامنہ ای کے نمائندے الغازی عسکر کے حوالے سے لکھا کہ ‘اگر بقیہ چند معاملات بھی حل ہوجاتے ہیں تو امید ہے جلد ہی ایرانی شہریوں کو سعودی عرب روانہ کیا جاسکے گا’۔

خیال رہے کہ فروری میں ایرانی وفد کی سعودیہ روانگی کے بعد سے دونوں ممالک کے درمیان مذاکرات کا سلسلہ جاری ہے۔

یہ بھی پڑھیں: سعودی عرب نے حج کی دعوت دے دی، ایران کی تصدیق

گذشتہ تین دہائیوں کے دوران 2016 وہ پہلا سال تھا جب ایرانی شہریوں کو حج کا حصہ بننے سے روکا گیا، اس پابندی میں اہم رکاوٹ 2015 میں حج کے دوران منیٰ میں ہونے والے بھگدڑ کے واقعے میں جاں بحق ایرانی عازمین حج کی سیکیورٹی کی ضمانت نہ ہو پانا تھا۔

ایران کا کہنا تھا کہ اس افسوس ناک حادثے میں 464 ایرانی حجاج جاں بحق ہوئے تھے۔

ایران نے اس سانحے کی ذمہ داری حج کے منتظمین پر عائد کرتے ہوئے ان کی اہلیت پر سوالات اٹھائے تھے اور 2016 میں ہونے والے حج میں اپنے شہریوں کو بھیجنے سے انکار کردیا تھا۔

مزید پڑھیں: شہریوں کے حج کا معاملہ، ایرانی وفد سعودیہ روانہ

دونوں ملکوں کے درمیان تعلقات جنوری 2016 میں اس وقت کشیدہ ہوگئے تھے جب سعودی عرب نے شیعہ عالم دین کو سزائے موت دے دی تھی۔

اس واقعے کے بعد ایران میں مشتعل افراد نے تہران میں سعودی سفارتخانے پر دھاوا بول دیا تھا جس کے نتیجے میں سعودی عرب نے ایران سے سفارتی تعلقات منقطع کرلیے تھے۔

گزشتہ برس ایران اور سعودی عرب کے درمیان ایرانی عازمین حج کو ویزا جاری کرنے اور ان کی سیکیورٹی کے معاملات کی بناء پر دونوں ممالک میں حج مذاکرات ناکام ہوگئے تھے۔

یہ بھی پڑھیں: معاہدےمیں ناکامی،ایرانی شہری حج نہیں کرسکیں گے

ایران کا مطالبہ تھا کہ انہیں تہران میں موجود سوئس سفارت خانے کے ذریعے ویزا جاری کیے جائیں، کیوں کہ ایران میں موجود سعودی سفارت خانے کو نذر آتش کیے جانے کے بعد بند کردیا گیا تھا۔

دونوں ممالک کے درمیان کشیدہ تعلقات کی وجہ سے حج مذاکرات ناکام ہونے کے بعد گزشتہ برس ایرانی شہری حج کی سعادت سے محروم رہے تھے۔

تاہم رواں سال ایرانی حکام نے سعودی عرب کی جانب سے حج کا سرکاری دعوت نامہ موصول ہونے کی تصدیق کی تھی۔