کراچی (ویب ڈیسک) پاکستان تحریک انصاف کے رکن قومی اسمبلی فیصل واوڈا نے نوازشریف کی اہلیہ کلثوم نواز کے انتقال پر دکھ اور افسوس کا اظہار کرتے ہوئے ماضی میں کلثوم نواز کی بیماری سے متعلق غیر مناسب الفاظ استعمال کرنے پر شریف خاندان سے معذرت کی ہے۔ گزشتہ روز ایک انٹرویومیں فیصل واوڈا نے کہا کہ،
بیگم کلثوم نواز کے انتقال کی خبر افسوسناک ہے، کسی بھی شخصیت کی بیماری سے متعلق بیانات سے رہنمائوں کو اجتناب کرنا چاہیے اور اس طرح کا ٹرینڈ ٹھیک نہیں۔ انہوں نے کہاکہ ہم سب کو ملکر ایسی روایات کا خاتمہ کرنا چاہیے۔ جبکہ اس سے قبل رہنما پیپلز پارٹی اعتزاز احسن نے کہا ہے کہ وہ نواز شریف کی اہلیہ بیگم کلثوم نواز کی وفات پر افسردہ ہیں اور ان کے اہل خانہ کو ماضی میں ان کے الفاظ سے جو تکلیف پہنچی تھی، اس پر معذرت خواہ ہیں۔جیو نیوز سے گفتگو کرتے ہوئے ان کا کہنا تھا کہ بیگم کلثوم نواز نیک اور پارسا خاتون تھیں۔اعتزاز احسن نے کہا کہ مجھے اظہار تاسف کی پیشکش کی گئی تھی لیکن میں نے ایسا نہیں کیا جس پر افسوس ہے۔ انہوں نے کہا کہ بیگم کلثوم نواز کا انتقال شریف خاندان کابہت بڑا نقصان ہے، جمہوریت کیلئے ان کی گراں قدر خدمات تھیں۔رہنما پی پی پی نے کہا کہ سابق صدر جنرل (ر) پرویز مشرف کے دور میں بیگم کلثوم نواز جوانمردی سے ڈٹی رہیں۔خیال رہے کہ رواں سال جون میں اعتزاز احسن کا ایک متنازع بیان سامنے آیا تھا جس میں انہوں نے شریف خاندان پر الزامات عائد کرتے ہوئے کہا تھا کہ زبان زد عام ہے کہ ہارلے اسٹریٹ کلینک جہاں کلثوم نواز زیرعلاج تھیں، شریف خاندان کی ملکیت ہے۔اعتزاز احسن نے الزام عائد کیا تھا کہ ہارلے اسٹریٹ کوئی اسپتال نہیں کلینک ہے لیکن وہاں دل کے بائی پاس ہوتے ہیں۔ اعتزاز احسن نے سابق وزیراعظم نواز شریف کے اپنے اہلیہ کے ساتھ رہنے کو تاخیری حربہ قرار دیا تھا۔یہ بیان صدر مملکت کے لیے اپوزیشن کے متفقہ امیدوار کی حیثیت سے اعتزاز احسن کے نام پر ن لیگ کے اعتراض کی بنیادی وجہ سمجھا جاتا ہے۔معاملہ حل کرنے کے لیے ن لیگ اور پی پی پی رہنماؤں کی کئی بیٹھکیں ہوئیں تاہم پی پی پی کے شریک چیئرمین آصف علی زرداری نے اعتزاز احسن کا نام واپس لینے سے انکار کردیا تھا۔بعدازاں پی پی پی نے اعتزاز احسن جبکہ دیگر اپوزیشن جماعتوں بشمول ن لیگ نے مولانا فضل الرحمان کو اپنا صدارتی امیدوار نامزد کیا تھا۔