Tahir ul Qadri

لاہور (جیوڈیسک) انسداد دہشت گردی کی عدالت نے پاکستان عوامی تحریک کے سربراہ ڈاکٹر طاہر القادری سمیت 10 افراد کے خلاف اشتہار جاری کرنے کا حکم دے دیا۔

طاہر القادری سمیت عوامی تحریک کے رہنماؤں کے خلاف دیپالپور میں نفرت انگیز تقریر کرنے کا مقدمہ درج ہے جس پر تفتیش کے لئے پیش نہ ہونے پر پولیس نے انسداد دہشت گردی کی عدالت سے رجوع کیا۔

دوران سماعت مقدمے کے تفتیشی افسر نے کہا کہ مقدمے کے تمام ملزمان روپوش ہیں اور کوئی بھی تفتیش کے لئے پیش نہیں ہو رہا لہٰذا عدالت سے استدعا کی جاتی ہے کہ ملزمان کے گھروں پر پیشی کے اشتہار چسپاں کرنے کے احکامات جاری کئے جائیں۔

عدالت نے تمام ملزمان کے گھروں پر پیشی کے اشتہار چسپاں کرنے کی اجازت دیتے ہوئے کہا کہ ملزمان اگر اب بھی پیش نہ ہوئے تو ایک ماہ کے بعد ان کے دائمی گرفتاری وارنٹ جاری کئے جائیں گے۔