کراچی: آل پاکستان آئل ٹینکرز ایسوسی ایشن نے اپنے مطالبات کے حق میں غیر معینہ مدت کے لئے ملک گیر ہڑتال کردی ہے جب کہ ہڑتال سے آئل ٹینکرز  ایسوسی ایشن کے دو دھڑوں نے لاتعلقی ظاہر کردی۔

Countrywide Strike for the indefinite period of oil tankers

چیئرمین آل پاکستان آئل ٹینکرز ایسوسی ایشن میر یوسف شاہوانی  کے مطابق پہیہ جام ہڑتال اوگرا، پنجاب پولیس، سندھ ایکسائز پولیس اور دوسرے  اداروں کے خلاف کی جارہی ہے اور مطالبات منظور ہونے تک پورے ملک میں پیٹرولیم مصنوعات کی سپلائی بند رکھی جائے گی۔سندھ اور پنجاب میں کرایوں میں جبری کٹوتی کی جارہی ہے جب کہ موٹر وے پولیس ناجائز جرمانے اور چالان کر رہی ہے۔ انہوں نے  وزیراعظم سے اپیل کی کہ ٹرانسپورٹرز کے مطالبات منظور کیے جائیں۔ دوسری جانب ذرائع کا کہنا ہے کہ آئل ٹینکرز کی ہڑتال کے اثرات 10 فیصد سے زیادہ نہیں پڑیں گے کیونکہ آئل ٹینکرز مالکان کے 3 گروپس میں سے صرف ایک گروپ نے ہڑتال کی ہے جب کہ پٹرولیم ڈیلرزکا کہنا ہے کہ ملک بھر میں پمپس پر وافرتیل موجود ہے تاہم شہری ضرورت سے زائد پٹرول نہ بھروائیں۔