Dangerous challenges

جدہ …شاہد نعیم …سعوی ولی عہد شہزادہ محمد بن نائف نے باور کرایا ہے کہ عرب دنیا اس وقت خطرناک سیکورٹی چیلنجوں کا سامنا کر رہی ہے جن کا پورے عزم اور طاقت کے ساتھ مقابلہ کرنے کی ضرورت ہے۔ انہوں نے یہ بات تیونس میں عرب وزرائےداخلہ کے اجلاس سے خطاب کرتے ہوئے کہی۔
سعودی ولی عہد کا کہنا تھا کہ ان چیلنجوں کی کمان شرپسند بزدل عناصر کے ہاتھ میں ہے جن کا مقصد عرب ممالک کو غیرمستحکم کرنا، ان کے وجود کو خطرے میں ڈالنا، ان کے اتحاد اور یکجہتی کو پارہ پارہ کرنا، ان کی دولت پر قبضہ کرنا اور عرب دنیا کے شہریوں کو غربت، بھوک اور بیماری کے گورکھ دھندوں میں پھنسانا ہے۔ بعض عناصر مسلکی اور فرقہ وارانہ اختلافات کو اپنے مقاصد پورا کرنے کے لیے استعمال کررہے ہیں جب کہ بعض عناصر سیاسی اور اقتصادی بنیادوں پر عوام میں اشتعال پیدا کر رہے ہیں ۔شہزادہ محمد بن نائف نے واضح کیا کہ اگر ان چیلنجوں کا سامنا پرعزم اور فیصلہ کن انداز سے نہ کیا گیا تو خدانخواستہ سب کو اس کے تکلیف دہ نتائج بھگتنا ہوں گے… اپنی قیادت اور عوام کے سامنے ہماری بہت بڑی ذمہ داری ہے ۔سعودی ولی عہد نے عرب دنیا کے سیکورٹی اداروں سے مطالبہ کیا کہ وہ مربوط تعاون کے ذریعے ان واقعات کا مقابلہ کریں جو مختلف عرب ممالک میں امن و امان کی صورت حال پر اثر انداز ہوتے ہیں ۔سعودی ولی عہد جو عرب وزرائے داخلہ کی کونسل کے اعزازی سربراہ بھی ہیں.. اپنے ملک کے وفد کی قیادت کرتے ہوئے عرب وزرائے داخلہ کے 33 ویں اجلاس میں شرکت کے لیے منگل کی شب تیونس پہنچے تھے۔عربی روزنامے الشرق الاوسط کے مطابق فرانسیسی ذرائع کا کہنا ہے کہ پیرس حکومت فلسطینیوں اور اسرائیلیوں کے درمیان امن عمل کے سلسلے میں سعودی عرب کی مدد اور کردار کی وجہ سے مملکت کو بہت اونچا مقام دیتی ہے.. بالخصوص ریاض حکومت نے 2002 میں بیروت کے عرب سربراہ اجلاس میں جو عرب منصوبہ پیش کیا تھا وہ سیاسی منظرنامے میں سعودی عرب کے حجم اور اس کے رسوخ کی دلیل ہے۔فرانس آئندہ ماہ پیرس میں ایک وسیع بین الاقوامی کانفرنس منعقد کرنے کا ارادہ رکھتا ہے تاکہ امن کے حوالے سے اپنے منصوبے کے لیے میدان تیار کر سکے