Democratic and Republican
آئیووا کی اکتیس لاکھ آبادی میں پانچ لاکھ چوراسی ہزار ڈیمو کریٹک ووٹرز ، چھ لاکھ گیارہ ہزار ری پبلکنز جبکہ سات لاکھ پچیس ہزار آزاد ووٹرز رجسٹرڈ ہیں
نیو یارک (یس اُردو) امریکی صدارتی انتخابات کے پہلے مرحلے کاؤسز میں ووٹنگ آئیووا میں ہو گی جس میں ڈیمو کریٹک اور ریپبلکن پارٹیوں کے فائنل صدارتی امیدواروں کا انتخاب کیا جائے گا ۔
امریکی صدارتی انتخابات کے طریقہ کار میں پہلا مرحلہ آئیووا میں ہو گا ، ریاست آئیووا کے رہائشی وائٹ ہاؤس کی دوڑ کے لیے مہینوں پر پھیلے دو ہزار سولہ کے انتخابات کے لیے اپنا حق رائے دہی استعما ل کریں گے ۔
یہاں سیاسی جماعتیں اپنے طور پر براہِ راست کاؤکسز منعقد کر رہی ہیں جس میں ڈیمو کریٹک اور ریپبلکنز جماعتوں کے نامزد صدارتی امیدواروں میں فائنل صدارتی امیدوارکا چناؤ ہو گا ۔آئیووا کی اکتیس لاکھ آبادی میں پانچ لاکھ چوراسی ہزار ڈیمو کریٹک ووٹرز ، چھ لاکھ گیارہ ہزار ری پبلکنز جبکہ سات لاکھ پچیس ہزار آزاد ووٹرز رجسٹرڈ ہیں ۔آٹھ نومبر تک اٹھارہ سال کی عمر میں پہنچنے والا امریکی شہری بھی یکم فروری کو ووٹ ڈالنے کا اہل ہے ۔آئیووا میں ڈیمو کریٹک پارٹی کے نامزد صدارتی امیدواروں میں سابق وزیر خارجہ ہیلری کلنٹن اور سینیٹر برنی سینڈرز کے درمیان کانٹے کا مقابلہ ہے جبکہ ری پبلکنز کے ڈونلڈ ٹرمپ جیب بش اور ٹیڈ کروز ایک دوسرے کے سخت حریف سمجھے جا رہے ہیں ۔امریکی انتخابات میں کاؤکسز نجی معاملہ ہے ، جنھیں سیاسی جماعتیں اپنے طور پر براہِ راست منعقد کرتی ہیں ۔
