لاہور(ویب ڈیسک)پاکستان عوامی تحریک کے سربرای ڈاکٹر طاہر القادری نے کہا ہے کہ پاکستان شہدا کی امانت ہے،لاکھوں جانیں قربان کرکے یہ وطن حاصل کیا گیا اور افواج پاکستان کے جوانوں افسران کی قربانیوں سے پاکستان قائم و دائم ہے اور انشا اللہ قیامت تک قائم و دائم اور ترقی کی منازل طے کرتا رہے گا۔6 ستمبر یوم دفاع کے حوالے سے اپنے بیان میں ڈاکٹر طاہر القادری کا کہنا تھا کہ پاکستان کے قیام اور پاکستان کی حفاظت کیلئے جانوں کے نذرانے دینے والے شہدا کیلئے دعا گو ہیں کہ اللہ تعالیٰ انکے درجات بلند فرمائے،انکے عزیز و اقارب کو مصائب و آلام سے محفوظ رکھے۔انہوں نے کہا کہ اللہ تعالیٰ کے نزدیک شہید کا رتبہ بہت بلندترہے،شہید کے حوالے سے قرآن مجید کا اعلان ہے کہ شہید زندہ ہے اور اللہ تعالیٰ اسے رزق پہنچاتا ہے،اسلام اور وطن کیلئے جانیں دینے والے عظیم اور قوم کے ہیرو ہیں،وطن کی حرمت پر قربان ہونیوالے جانثار قوموں کا فخر اور انکی حفاظت کی ضمانت ہوتے ہیں۔ ڈاکٹر طاہر القادری نےکہاکہ اللہ تعالیٰ پاکستان اور اسکے کروڑوں محب وطن عوام کی حفاظت فرمائے،پاکستان کو حاسدین اور بد خواہوں کے ناپاک عزائم سے محفوظ و مامون رکھے۔ جبکہ دوسری جانب ایک خبر کے مطابق وزیر اعظم عمرا ن خان نے 6 ستمبر کو یوم دفاع کے ساتھ یوم یک جہتی کشمیر منانے کا فیصلہ کیا ہے۔وزیراعظم کی زیر صدارت حکومتی اور پارٹی ترجمانوں کا اجلاس ہوا، جس میں فیصلہ کیا گیا کہ عمران خان کل جمعہ کومظفر آبادجائیں گے،اس موقع پر وزیراعظم مظفرآباد میں کشمیری شہدا کی یاد میں تقریب سے خطاب کریں گے۔وزیراعظم نے 6 ستمبر سے متعلق فیصلے کی روشنی ترجمانوں کو ہدایت کی ہے کہ کل ملک بھرمیں کشمیریوں سے اظہار یکجہتی کیا جائے۔وزیر اعظم نے کہا کہ صوبائی دارالحکومتوں میں تقریبات سے کشمیریوں سے بھرپور اظہار یک جہتی کیا جائے، ملک بھرکےعوام یوم دفاع پر شہدا کے خاندانوں کے پاس پہنچیں۔بعد ازاں وزیر اعظم نے ٹویٹس کرتے ہوئے کہا کشمیر میں بھارت کے غاضبانہ قبضے کو تنقید کا نشانہ بنایا۔انھوں نے کہا کہ آج مودی کی بھارتی فورسزکا مقبوضہ کشمیرپرقبضے کا32 واں دن ہے، بھارتی فورسزنے کشمیریوں کو قتل کیا،پیلٹ گنز سے زخمی کیا،کرفیو کے دوران بھارتی فورسزنے کشمیری مرد، خواتین، بچوں کو بدترین تشدد کا نشانہ بنایا، کشمیریوں کو گرفتار کر کے بھارت کی جیلوں میں ڈال دیا گیا۔انہوں نے کہا کہ ہسپتالوں میں طبی سہولیات ختم، بنیادی اشیائے ضروریہ کی شدید قلت پیدا ہو چکی ہے مگر مواصلات پر تالہ بندی سے اہل کشمیر کی آواز بیرونی دنیا تک پہنچنے سے روک کر انہیں اپنے خاندانوں سے کاٹا جا چکا ہے، اسکے باوجود خوفناک داستانوں کی بازگشت بین الاقوامی میڈیا میں سنائی دے رہی ہے۔وزیر اعظم عمران خان کاکہنا تھا کہ انسانی حقوق سمیت تمام بین الاقوامی قوانین کی بھارت کے ہاتھوں پامالی دنیا کے سامنے ہے،جب مسلمانوں پر ستم کے پہاڑ توڑے جاتے ہیں تو کیا اقوام عالم کی انسانیت دم توڑ دیتی ہے؟ دنیا بھر میں بسنے والے 1.3 ارب مسلمانوں کو کیا پیغام دیا جارہا ہے؟اقوام عالم 1938 میں میونخ کیطرح اب محض لاعلمی کا بہانہ نہیں تراش سکتیں،ہندوبالادستی کے نظریے میں گندھی فاشسٹ مودی سرکار کے مقبوضہ جموں و کشمیر، خود بھارت (آسام وغیرہ) اور آزاد جموں و کشمیر میں مسلمانوں کے قتل عام اور نسل کشی کے مکروہ عزائم پوری دنیا پر آشکار ہو چکے ہیں۔