Ehsan ul Haq Ansari

شیخوپورہ(بیورورپورٹ)پاکستان مسلم لیگ (ن) کے ضلعی رہنما احسان الحق انصاری نے کہا ہے کہ قوم کی دعائیں رنگ لے آئیں اور وزیراعظم نواز شریف دل کے کامیاب آپریشن کے ساتھ ایک اور آزمائش میں سرخرو ٹھہرے ہیں۔ انشاء اللہ قوم کی دعاؤں کے نتیجہ میں وزیراعظم نواز شریف بہت جلد مکمل طور پر صحت یاب ہو کر وطن واپس آئیں گے اور اپنے چاہنے والوں کے درمیان ہوں گے، داخلی اور خارجی سطح پر پاکستان اس وقت جن مشکلات اور چیلنجز سے دوچار ہے، ان حالات میں ملک و قوم کو وزیراعظم نواز شریف جیسی محب وطن ، مخلص، بے لوث اور جرات مند قیادت کی ازحد ضرورت ہے۔ مسلم لیگ ن کی حکومت نے عوام کی خوشحالی اور ملک کی تعمیر و ترقی کا عہد کر رکھا ہے اور اپنے منشور کے مطابق ملک میں تعمیر و ترقی کا سفر شروع کر رکھا ہے۔ صحافیوں سے گفتگو کرتے ہوئے احسان الحق انصاری نے کہا کہ وزیراعظم نواز شریف کی قیادت میں ہی چائنہ کوریڈور بنے گا اور پاکستان سے بجلی اور گیس کے بحرانوں کا خاتمہ ہو گا، انہوں نے کہا کہ قوم کی دعائیں اپنے قائد نواز شریف سے والہانہ محبت کا منہ بولتا ثبوت ہے اور ملک بھر کے کروڑوں عوام کی دعاؤں ہی کا نتیجہ ہے کہ وزیراعظم نواز شریف کا آپریشن کامیاب ہوا ہے اور اب وہ تیزی کے ساتھ روبہ صحت ہورہے ہیں، انہوں نے کہا کہ انشاء اللہ وزیراعظم نواز شریف جلد مکمل طور پر صحت یاب ہو کر وطن واپس آئیں گے اورپہلے کی طرح عوامی خدمت اور سرکاری امور انجام دیں گے اور اﷲ کے فضل و کرم سے پاکستان کے دشمنوں کی تمام ناپاک سازشیں ناکامی سے دوچار ہو جائیں گی۔