Farooq Tahir

آزاد کشمیر قانون ساز اسمبلی کے انتخابات کا چوتھا مرحلہ مکمل ہو گیا، شاہ غلام قادر سپیکر اور سردار فاروق احمد طاہر ڈپٹی سپیکر منتخب ہو گئے۔
مظفر آباد: (یس اُردو) مظفر آباد میں آزاد کشمیر قانون ساز اسمبلی کا پہلا اجلاس سپیکر سردار غلام صادق کی صدارت میں منعقد ہوا۔ اجلاس میں 49 نومنتخب ممبران اسمبلی میں سے 48 نے حلف اٹھایا جبکہ جموں و کشمیر پیپلز پارٹی کے صدر سردار خالد ابراہیم ایوان سے غائب رہے۔
حلف اٹھانے والوں میں مسلم لیگ ن کے 37، جماعت اسلامی کے دو، پیپلز پارٹی کے 4، مسلم کانفرنس کے 3 جبکہ پی ٹی آئی کے دو ممبران اسمبلی شامل ہیں۔ ممبران کے حلف کے بعد سپیکر اور ڈپٹی سپیکر کا انتخاب عمل میں لایا گیا۔مسلم لیگ ن کے شاہ غلام قادر 48 میں سے 39 ووٹ لیکر سپیکر منتخب ہوئے جبکہ ان کے مدمقابل پیپلز پارٹی کے امیدوار عامر غفار لون کو 4 اور مسلم کانفرنس کے ملک محمد نواز کو تین ووٹ ملے۔ ڈپٹی سپیکر کے عہدے کے لئے مسلم لیگ ن کے ہی فاروق احمد طاہر 39 ووٹ لے کر منتخب ہوئے۔سپکر اور ڈپٹی سپیکر کے انتخاب کے بعد الیکشن کا چوتھا مرحلہ مکمل ہو گیا جبکہ پانچویں اور آخری مرحلے میں کل قانون ساز اسمبلی کے وزیر اعظم کو منتخب کیا جائے گا جس کے ساتھ ہی آزاد کشمیر کی دسویں قانون ساز اسمبلی کے انتخابات کا عمل مکمل ہو جائے گا۔