لاہور(ویب ڈیسک ) صوبہ پنجاب کے نامزد وزیر اطلاعات صمصام بخاری آج اپنے عہدے کا حلف اٹھائیں گے، انہیں گزشتہ روز فیاض الحسن چوہان کے مستعفی ہونے کے بعد صوبے کا نیا وزیر اطلاعات نامزد کیا گیا تھا۔تفصیلات کے مطابق پنجاب کے نامزد وزیر اطلاعات صمصام بخاری آج اپنے عہدے کا حلف اٹھائیں گے، حلف برداری کی تقریب صبح 10 بجے گورنر ہاؤس میں منعقد ہوگی۔گورنر پنجاب چوہدری محمد سرور نئے وزیر اطلاعات سے حلف لیں گے۔ اس موقع پر وزیر اعلیٰ پنجاب عثمان بزدار و دیگر صوبائی حکام بھی تقریب میں موجود ہوں گے۔خیال رہے کہ اقلیتی برادری سے متعلق متنازعہ بیان دینے پر گزشتہ روز وزیر اعلیٰ پنجاب عثمان بزدار کے حکم پر سابق صوبائی وزیر اطلاعات فیاض چوہان اپنے عہدے سے مستعفی ہوگئے تھے۔فیاض چوہان نے ہندو برادری سے متعلق اپنے بیان پر معذرت بھی کی تھی اور کہا تھا کہ میرا مخاطب بھارتی وزیر اعظم، بھارتی فوج اور بھارتی میڈیا تھا، پاکستان میں ہندو اقلیت نہیں۔ انہوں نے کہا تھا کہ پاکستان میں ہندوؤں کی دل آزادی ہوئی ہے تو معذرت خواہ ہوں۔تاہم وزیر اعظم عمران خان کی جانب سے ان کے بیان کا نوٹس لیتے ہوئے کہا گیا تھا کہ اس نوعیت کا کوئی بھی بیان قابل قبول نہیں، کسی بھی مذہب کی دل آزاری قبول نہیں ہوگی۔وزیر اعظم نے تمام وفاقی اور صوبائی وزرا کو ایسے معاملات پر محتاط رہنے کی ہدایت بھی کی جبکہ انہوں نے وزیر اعلیٰ پنجاب کو فیاض الحسن کے خلاف فوری ایکشن لینے کا حکم بھی دیا تھا۔بعد ازاں وزیر اعلیٰ نے فیاض چوہان کو استعفیٰ دینے کی ہدایت کردی تھی جس کے بعد سابق وزیر اپنے عہدے سے مستعفی ہوگئے۔یہ پہلا موقع نہیں ہے جب فیاض چوہان کا کوئی بیان تنازعے کا سبب بنا، ابتدا ہی سے اپنے بیانات کے باعث تنازعات کا شکار رہنے والے فیاض چوہان کو کچھ عرصہ قبل بھی‌ ایک اداکارہ سے متعلق اپنے غیر محتاط بیان پر معافی مانگنی پڑی تھی۔