اسلام آباد (ویب ڈیسک) مولانا فضل الرحمان کے دھرنے کے حوالے سے سوشل میڈیا پر ایسے نوٹیفکیشن گردش کر رہے ہیں جن میں یہ تاثر دیا جارہا ہے کہ دھرنے کے شرکا کو ہم جنس پرستی سے روکنے کا سرکاری انتظام کیاجائے گا۔ یہ تو پہلے ہی واضح ہوچکا ہے کہ ایسے نوٹیفکیشن جعلی ہیں لیکن اب ڈپٹی کمشنر اسلام آباد نے اس حوالے سے بڑا قدم اٹھالیا ہے۔ڈپٹی کمشنر اسلام آباد حمزہ شفقات کی درخواست پر ان سے منسوب جعلی نوٹیفکیشن پھیلانے والوں کے خلاف ایف آئی آر درج کرلی گئی ہے۔ حمزہ شفقات نے لوگوں سے درخواست کی ہے کہ وہ اپنے سوشل میڈیا سے جعلی نوٹیفکیشن پر مبنی پوسٹ ڈیلیٹ کردیں اور اس حوالے سے کسی پراپیگنڈے کا حصہ نہ بنیں۔ خیال رہے کہ سوشل میڈیا پر ایک نوٹیفکیشن گردش کر رہا ہے جس میں اسلام آباد کی اتھارٹیز کو ہدایت کی گئی ہے کہ 27 اکتوبر کے آزادی مارچ کے تناثر میں شہر اقتدار میں ہم جنس پرستی بڑھنے والی ہے ، اس لیے ایسے لوگوں پر نظر رکھی جائے اور ان کے خلاف کارروائی کی جائے۔ جبکہ دوسری جانب ایک خبر کے مطابق صوبائی وزیر اطلاعات میاں اسلم اقبال نے کہاہے کہ دھرنے والوں کے ساتھ کیا سلو ک کرنا ہے ، مولانا فضل الرحمان خود ہی بتاچکے ہیں۔دنیا نیوز کے پروگرام ”آن دا فرنٹ“میں گفتگو کرتے ہوئے میاں اسلم اقبال نے کہا کہ کل سے ایک لیٹر سوشل میڈیا پر چل رہاہے جس کی شق نمبر چار میں کہا گیا کہ مدرسے کے بچے ڈنڈے اور خوراک لیکر آئیں اور شق نمبر چھ کو میں پڑھنا نہیں چاہتا ۔انہوں نے کہا کہ جب طاہر القادری اور تحریک انصاف نے دھرنا دیا تھا تو مولانا فضل الرحمان نے اپنی تقریر میں کہا تھا کہ اگر یہ اسلام آباد آرہے ہیں تو میں یہ تو نہیں کہتا کہ فوج ان پرگولی چلائے لیکن آنسو گیس اور لاٹھی چارج کرکے ان تین چارہزار لوگوں کو منتشر کردیا جائے تو اس طرح مولانا فضل الرحمان نے خودہی دھرنے کا علاج بھی بتادیا ہواہے ۔ پرامن احتجاج کی اجازت موجود ہے لیکن توڑ پھوڑ اور جلاﺅ گھیراﺅ کی کوئی ضرورت نہیں ہے ۔