اسلام آباد(یس اردو نیوز) عالمی برادری کی بھارتی متعصب ہندوتوا سوچ اور اس سے  خطے کے امن کو لاحق خطرات کی طرف توجہ مبذول کروانے کیلئے وزارت خارجہ نے لائحہ عمل طے کرلیا۔ اس سلسلے میں وزیر خارجہ شاہ محمود قریشی کی زیر صدارت  وزارت خارجہ میں اعلیٰ سطح کا اجلاس ہوا۔ اجلاس میں   معاون خصوصی برائے قومی سلامتی معید یوسف، سیکریٹری خارجہ سہیل محمود، اعلیٰ عسکری حکام اور وزارت خارجہ کے سینئر افسران نے شرکت کی۔ اجلاس میں مقبوضہ جموں و کشمیر میں جاری بھارتی جارحیت اور خطے میں امن و امان کی مجموعی صورتحال کے حوالے سے تفصیلی تبادلہ خیال کیا گیا۔ شاہ محمود قریشی نے کہا کہ نہتے کشمیریوں کو بھارتی مظالم سے نجات دلانے کے لیے عالمی برادری کو اپنا موثر کردار ادا کرنا ہوگا۔شرکا نے بھارتی حکومت کی جانب سے مقبوضہ جموں و کشمیر میں کیے گئے 5 اگست 2019 کے یکطرفہ اقدامات کی طرف عالمی برادری کی توجہ مبذول کروانے اور انہیں مزید اجاگر کرنے کے لیے مختلف تجاویز پرتبادلہ خیال کیا۔ اجلاس میں خصوصی طورپر افغان امن عمل سمیت علاقائی سلامتی کے مختلف امور پر مشاورت کی گئی۔ وزیر خارجہ نے کہا کہ بھارت کی ہندتوا سوچ اور جارحانہ پالیسیوں کے باعث پورے خطے کے امن و استحکام کو شدید خطرات لاحق ہیں، جبکہ وہ افغانستان میں قیام امن کی کاوشوں کو سبوتاژ کرنا چاہتا ہے۔ انہوں نے کہا کہ بھارت، مقبوضہ جموں و کشمیر میں جاری انسانی حقوق کی سنگین خلاف ورزیوں اور اپنی داخلی کمزوریوں پر پردہ ڈالنے کے لیے لائن آف کنٹرول (ایل او سی) کی خلاف ورزیوں کے ذریعے عام شہریوں کو نشانہ بنا رہا ہے۔ ان کا کہنا تھا کہ پاکستان، مقبوضہ وادی میں بھارتی فوج کشی اور انسانی حقوق کی مسلسل خلاف ورزیوں کو اقوام متحدہ سمیت ہر عالمی و علاقائی فورم پر اٹھا رہا ہے اور بھارت سرکار کا اصل چہرہ دنیا کے سامنے لا رہا ہے۔