کراکس: وینزویلا کے دارالحکومت کراکس میں قومی اسمبلی پر حکومت کے حامیوں نے حملہ کرکے حزبِ اختلاف کے متعدد ارکان کو زخمی کردیا۔

Government supporters prostrate on the assembly, opposition members were injured in Venezuela

وینزویلا میں گزشتہ ماہ سے حکومت اور اپوزیشن جماعتوں کے کارکنوں میں کشیدگی جاری ہے اور اپوزیشن کارکنان نے دارالحکومت کراکس کی سڑکوں کو میدان جنگ بنا رکھا تھا۔ تاہم حکومت کے حامیوں نے بھی ایک قدم آگے بڑھ کر انہیں جواب دیا اور گزشتہ روز کراکس میں قومی اسمبلی کے جاری اجلاس پر حملہ کرکے اپوزیشن اراکین کو تشدد کا نشانہ بنایا جس کے باعث کئی اپوزیشن ارکان لہولہان ہو گئے۔ 5 جولائی کو وینزویلا کے یومِ آزادی کے موقعے پر کراکس میں واقع قومی اسمبلی میں تقریب جاری تھی جس میں حزبِ اختلاف سے تعلق رکھنے والے ارکان کی بڑی تعداد موجود تھی جس پر حکومتی حامیوں نے دھاوا بول دیا۔ اس حملے میں وینزویلا اسمبلی کے 7 ملازمین اور حزبِ اختلاف کے 5 اراکین شدید زخمی ہوئے۔

اسمبلی عمارت میں موجود صحافیوں کا کہنا ہے کہ حملہ آور پتھروں، پائپوں اور ڈنڈوں سے لیس تھے جنہوں نے اپوزیشن اراکین کے علاوہ میڈیا کے نمائندوں کو بھی تشدد کا نشانہ بنایا اور توڑ پھوڑ مچائی۔ مشتعل حملہ آوروں نے عمارت کے اندرونی حصوں کو آگ لگا دی جبکہ سیکیورٹی اہلکار کئی گھنٹوں کی کوششوں کے بعد صورتحال پر قابو پانے میں کامیاب ہوئے۔ امریکی محکمہ خارجہ نے اس واقعے پر شدید ردِعمل ظاہر کرتے ہوئے اسے جمہوری اصولوں پر حملہ قرار دیا ہے۔