اسلام آباد:  وزیرِ دفاع خرم دستگیر نے کہا ہے پاکستان اب امریکا سے آنکھوں میں آنکھیں ڈال کر بات کرتا ہے۔ ملک کو درپیش دفاعی، خارجی اور معاشی چیلنجز سے نمٹنے کے لئے سیاسی حکومتوں کو سازگار حالات ملنے چاہیں۔

وزیرِ دفاع خرم دستگیر نے اپنی دس ماہ کی کارکردگی کا بھرپور دفاع کرتے ہوئے نیشنل سیکیورٹی کمیٹی کے تسلسل سے اجلاس کو بہتر سول ملٹری تعلقات کے غماز قرار دیدیا۔ تاہم انہوں نے کہا کہ ملک کو درپیش دفاعی، خارجی اور معاشی چیلنجز سے نمٹنے کیلئے سیاسی حکومتوں کو سازگار حالات ملنے چاہیں۔

خرم دستگیر کا کہنا تھا کہ امریکا پاکستان کے نو ارب ڈالر دبائے بیٹھا ہے، اس سے تعلقات میں نیا موڑ آ چکا ہے۔ پاکستان اب امریکا سے آنکھوں میں آنکھیں ڈال کر بات کرتا ہے۔

وزیرِ دفاع کا کہنا تھا بھارت بلوچستان میں پاکستان مخالف سرگرمیوں میں مصروف ہے۔ کلبھوشن یادیو جیسے کرداروں سے نمٹنے کیلئے سیکیورٹی ادارے کڑی نظر رکھے ہوئے ہیں۔