لاہور (ویب ڈیسک) منیر نیازی جیسا تو دور کی بات، اس سے ملتا جلتا بھی نہ کوئی پہلے تھا نہ آئندہ ہوگا۔ منیر کی شاعری توبےمثال اور لازوال ہے ہی، اس کی جملہ بازی بھی لاجواب اور انوکھی ہوتی مثلاً ایک بار کسی کو اوقات سے باہر بلکہ بہت ہی باہر نکلتے اور بڑھکیں بونگیاں مارتے، لاف زنی کرتے دیکھا تو منیر نے اپنے مخصوص انداز میں کہا…. نامور کالم نگار حسن نثار اپنے ایک کالم میں لکھتے ہیں ۔۔۔۔’’ہے تو یہ اسکوٹر لیکن ہارن اس کو کسی ٹرک کا لگا ہوا ہے‘‘ مدتوں بعد منیرنیازی کا یہ تبصرہ مجھے تحریک ِ انصاف کے کچھ نوزائیدہ منتخب نمائندوں کو دیکھ کر یاد آرہا ہے جو ہر وقت، ہر جگہ گرم توے پر اچھل کود میں مصروف ہوتے ہیں۔ مزید چند مہینے یا شاید ہفتے یہ پرفارمنس اسی طرح جاری رہی تو لوگ انہیں سنجیدگی سے لینا چھوڑ دیں گے اور پھر ان میں ’’تبدیلی‘‘ آ بھی گئی تو ان کا امیج تبدیل نہیں ہوگا۔ انہیں چاہئے اپنے حال پر رحم کھائیں کیونکہ اس رویہ سے خود انہیں ہی نہیں، ان کی پارٹی اور حکومت کو بھی نقصان ہوگا۔ مخصوص قسم کی گردان سے بچیں، تحمل سے کام لیں اور تعمیری قسم کے موضوعات پرفوکس کریں کیونکہ ایک جمہوری حادثے کے نتیجہ میں ان پر پارلیمنٹیرینز ہونے کی مہر لگ چکی ہے۔خود عمران خان کے لئے کھیل بہت خطرناک حدود میں داخل ہوچکا ہے کیونکہ پی ٹی آئی میں وہ واحد آدمی ہے جس کا سب کچھ اسٹیک پر لگ چکا ہے۔ باقیوں کے پاس اول تو گنوانے کو ہے کچھ نہیں اور اگر ہے بھی تو وہ بہت معمولی، مختصر اور محدود ہے جبکہ خوش قسمتی یا بدقسمتی سے عمران خان کے پاس گنوانے کوبہت کچھ ہے۔ ْ

عمران خان کی زندگی جان لیوا محنت سے حاصل کی گئی کامیابیوں سے عبارت ہے جس پر ناکامی اور شکست کا کوئی داغ نہیں۔ ایک عام کرکٹر سے ورلڈ کلاس کرکٹر بننے تک، ورلڈ کپ جیتنے سے لے کرتقریباً ناممکن کینسر اسپتال بنانےتک، ویرانے میں نمل یونیورسٹی کھڑی کرنے سے اک پٹی ہوئی پارٹی کو بام عروج پرپہنچانے تک، اس کی ہر فتح شانداراور یادگار ہے لیکن حالیہ چیلنج بہت بڑا اور انتہائی خطرناک ہے۔ نہ پاکستان نہ خود عمران خان کوئی ہزیمت افورڈکرسکتاہے کیونکہ آخری جنگ ہی فیصلہ کن ہوتی ہے۔ اس آخری جنگ میں پسپائی تمام تر گزشتہ فتوحات پر بھی پانی پھیر دےگی کہ تاریخ ایسی بے شمار مثالوں سے بھری پڑی ہے۔سلطنت ِ عثمانیہ کے بایزید یلدرم نے کبھی شکست نہیں کھائی تھی۔ ہر معرکہ میں فتح اس کے ہمرکاب رہی تھی اور اس پر اس کے لشکریوںکے اعتماد کا یہ عالم تھا کہ اکثر کہا کرتے کہ ….. ’’اگر آسمان بھی ہم پر آگرے تو ہم اسے اپنے نیزوں پر روک لیں گے‘‘ لیکن پھر ایک معمولی سی بات پر اس کا سامنا اپنے ہی جیسے اک اور ترک امیر تیمور سے ہوگیا۔ خوفناک جنگ کے نتیجہ میں ناقابل شکست یلدرم بری طرح شکست کھا کر قیدی ہو گیااور اسی حالت میں زندگی کی قید سےرہا ہوا۔

یلدرم ترکی زبان میں ’’آسمانی بجلی‘‘ کو کہتے ہیں لیکن تیمور کے ساتھ آخری معرکہ میں آسمانی بجلی مٹی کے دیئے کی طرح بجھ کر قصہ ٔ پارینہ میں تبدیل ہوگئی ۔آل عثمان بہت زرخیز خاندان تھا جس نے سلطان محمد فاتح (فاتح قسطنطنیہ) سے لے کر سلمان عالیشان تک جیسے جلیل القدر فاتحین کو جنم دیا کہ سلمان کو ’’عالیشان‘‘ کسی مسلمان نے نہیں اس کے دشمنوں نے قرار دیا تھا۔ پورا یورپ اس سے خوفزدہ رہتا اور ان کے درمیان یہ بات عام تھی کہ ’’جہاں سلطان سلمان کے گھوڑے کی ٹاپ پڑتی ہے، وہ علاقہ اس کا ہو جاتا ہے‘‘ لیکن پھر وہی سلطان یلدرم جو اپنے خاندان کے کسی اور جنگجو سے کم نہ تھا، آخری معرکہ میں شکست نے اس کی گزشتہ تمام کامیابیوں، فتوحات پر اس بری طرح پانی پھیر دیاکہ خود ترک مورخین بھی اس کے ساتھ انصاف نہیں کرتے کیونکہ آخری ایک شکست اس کی ہر فتح نگل گئی۔عمران خان کی زندگی کا یہ آخری معرکہ یعنی پژمردہ پاکستان کو اس کے پیروں پر کھڑا کرنا، اس بری طرح نوچے کھسوٹے گئے پاکستان کو نئے پر دے کرپھر سے اڑان کے قابل بنانا، اس کی اجڑی معیشت اور اداروں کو پھر سے آباد کرنا، ورلڈ کپ، کینسر اسپتال، نمل یونیورسٹی اور PTIبنانے سے کہیں زیادہ بڑا چیلنج ہے۔ لیکن مجھے یہ جنگ جیتنے کے لئے اس کے ’’لشکری‘‘ پوری طرح تیار دکھائی نہیںدیتے۔ چند روز قبل بھی میں نے ’’میں بہادر ہوں مگر ہارے ہوئے لشکر میں ہوں‘‘ والے شعر کا حوالہ دیا تو ’’بیک آف مائی مائنڈ‘‘ یہی کچھ تھا جوآج نسبتاً ذرا کھل کر بیان کر رہا ہوں۔اس فیصلہ کن بازی کے فیصلہ کن مرحلے میں عمران کو چاہئے اپنے بے ہدف ساتھیوں کو سمجھائے کہ ’’بولیں کم….. کام زیادہ کریں‘‘ خود انہیں بھی اس بات کااحساس ہونا چاہئے کہ نہ وہ، نہ ان کا کپتان، نہ ہمارا پاکستان….. کوئی بھی یہ جنگ، یہ بازی ہارنا افورڈ نہیں کرسکتا!