لاہور: کوٹ لکھپت جیل سے رہائی پانے والے تحریک انصاف کے رہنما علیم خان نے کہا ہے کہ عمران خان نیک اور ایماندار شخص ہیں کسی بھی مقصد کے بغیر اُن کا غیر مشروط ساتھ دیں گے، کوئی بھی مجھے عمران خان سے الگ نہیں کر سکتا، کوٹ لکھپت جیل سے رہا ہونے کے بعد اپنی رہائش گاہ پر استقبال کرنے والے کارکنان سے علیم خان نے خطاب کیا۔ اُن کا کہنا تھا کہ پارٹی کا کوئی عہدہ ملےنہ ملےہم ہمیشہ عمران خان کاساتھ دیں گے۔

علیم خان کا کہنا تھا کہ عمران خان نیک اور ایماندارشخص ہیں وہ جس مشن پر چل رہے ہیں ہم سب ساتھ کھڑے ہیں اور ہر صورت ساتھ دیں گے۔ اُن کا مزید کہنا تھا کہ عمران خان کی قیادت میں ہم ملک سے کرپشن کا خاتمہ کر کے ہی دم لیں گے۔قبل ازیں تحریک انصاف کے رہنما کو کوٹ لکھپت جیل کی انتظامیہ نے روبکار موصول ہونے کے بعد انہیں رہا کیا۔ پی ٹی آئی کے رکن صوبائی اسمبلی شعیب صدیقی علیم خان کی ضمانت جمع کرانے کے بعد کاغذات لے کر جیل پہنچے تھے۔پاکستان تحریک انصاف کے سینئیر رہنما عبدالعلیم نے عدالتی فیصلے کے مطابق 10 ، 10 لاکھ روپے کے مچلکے جمع کرائے تھے ، مچلکے احتساب عدالت میں جمع کرائے۔