Nawaz Sharif

اسلام آباد (یس ڈیسک) وزیراعظم نوازشریف نے ورلڈکپ میں پاک بھارت میچ پر قومی ٹیم کے لیے نیک خواہشات کا اظہار کرتے ہوئے کہا ہے کہ روایتی حریف کے خلاف ٹیم جم کر کھیلے قوم ساتھ ہے۔

وزیر اعظم نواز شریف نے قومی ٹیم کی حوصلہ افزائی کرتے ہوئے کہا ہے کہ قوم کی نظریں کرکٹ ٹیم پر لگی ہوئی ہیں، ورلڈکپ میچوں میں ٹیم سے اچھی توقعات ہیں جب کہ بھارت کے خلاف ٹیم جم کر کھیلے قوم اس کے ساتھ ہے۔ انہوں نے کہا کہ بھارت کے خلاف میچ میں قوم کی دعائیں ٹیم کے ساتھ ہیں، قومی ٹیم اہم میچ کے لیے اپنی تمام توائیاں صرف کردے، کھلاڑی جوش وجذبے اور پراعتماد ہوکر کھیلیں۔

دوسری جانب وزیراعظم نے پاک بھارت میچ کے دوران ملک بھر میں لوڈشیڈنگ نہ کرنے کی ہدایت کی ہے اور بجلی کی بلاتعطل فراہمی کو یقینی بنانے کا حکم دیا ہے۔

واضح رہے کہ ورلڈکپ کے انتہائی اہم میچ میں کل پاکستان اور بھارت کا اعصاب شکن مقابلہ ہوگا جس کے لیے دونوں ممالک کے عوام بھرپور جذبات کا اظہار کررہے ہیں جب کہ اس موقع پر اہم شہروں میں میچ دیکھنے کے لیے اسکرینیں بھی نصب کی جائیں گی۔