بھارتی ریاست کرناٹک میں اسمبلی انتخابات کے لیے ضلع مانڈیا کے مشہور پانچ روپیہ ڈاکٹر شنکرگوڑا بھی آزاد امیدوار کے طور پر میدان میں آگئے۔

ڈاکٹر شنکرگوڑا ضلع میں گزشتہ 35برس سے پانچ روپے فیس وصول کرنے کے باعث 5روپیہ ڈاکٹر کے نام سے جانے جاتے ہیں، وہ روزانہ تقریباً 500 مریضوں کا علاج کرتے ہیں۔

ذرائع کے مطابق ڈاکٹر گوڑا کی مکمل پیکیج کے ساتھ فیس 5 روپے فی مریض ہے جس میں بیماری کی تشخیص، مشاورت، نسخہ، دوائیں اور انجکشن کے اخراجات بھی شامل ہیں۔

ضلع مانڈیا کے ہر دل عزیز 5 روپیہ ڈاکٹر گوڑا کے علاقے میں کافی مداح ہیں، منی پال کے کستوربا میڈیکل کالج سے میڈیکل گریجویٹ ڈاکٹر گوڑانے ڈرماٹولوجی میں پی جی ڈپلومہ بھی کیا ہوا ہے۔

پانچ روپیہ ڈاکٹر کی مقبولیت ضلع کے کونے کونے میں موجود ہے اور لوگ جذام، خارش اور جنسی امراض کے علاج کیلئے بھی ان سے نسخے لکھواتے ہیں،ان کے مریضوں کا ماننا ہے کہ ان کے جادوئی ہاتھوں سے جلدی امراض اور جنسی امراض کا جلد علاج ممکن ہے۔

ذرائع کے مطابق ڈاکٹر گوڑا نے 35 سال سے نہ ہی اپنی فیس میں اضافہ کیا اور نہ ہی بہتر نوکری کی خاطر پرائیویٹ اسپتال میں ملازمت کی۔

ڈاکٹر گوڑا نے اپنی بیوی، بیٹی اور دیگر ساتھیوں کے ہمراہ متعلقہ دفتر میں کاغذات نامزدگی جمع کرائے۔

اس موقع پر میڈیا سے بات کرتے ہوئے پانچ روپیہ ڈاکٹر نے بتایا کہ ان کے اس حلقے میں کئی مسائل موجود ہیں، جس کی وجہ سے وہ یہاں سے الیکشن لڑنا اور جیتنا چاہتے ہیں۔

ذرائع کے مطابق ڈاکٹر گوڑا ابتداء میں جے ڈی ایس پارٹی سے ٹکٹ کے خواہش مند تھے،اس کے علاوہ وہ بی جے پی سے بھی ٹکٹ کی توقع کر رہے تھے تاہم کسی نے بھی ان کو ٹکٹ نہیں دیا جس پر انہوں نے آزاد امیدوار کے طور پرمقابلہ کرنے کا فیصلہ کیا ہے۔

واضح رہے کہ بھارتی ریاست کرناٹک میں اسمبلی انتخابات 12 مئی کو ہوں گے۔