Jammu and Kashmir:

برہان وانی کی شہادت کے خلاف بھارت مخالف احتجاج میں شدت آ رہی ہے ، مظاہروں پر قابو پانے کے لیے مزید فوجی دستے بھیجے گئے ہیں
سری نگر (یس اُردو) مقبوضہ کشمیر میں غاصب بھارتی افواج کی فائرنگ سے شہداء کی تعداد 23 ہو گئی ، ڈھائی سو سے زائد افراد زخمی ہیں ، سری نگر میں مظاہروں کے خوف کے پیش نظر کرفیو نافذ ہے ، کٹھ پتلی حکومت نے مظاہروں کے حالیہ لہر میں شہریوں کی ہلاکت کی مذمت کر دی جبکہ حریت رہنماؤں سے قیام امن کے لیے اپیل کر دی ہے ۔برہان وانی کی شہادت کے خلاف بھارت مخالف احتجاج میں شدت آ رہی ہے ۔ بھارتی میڈیا کے مطابق وادی میں جگہ جگہ احتجاج کا سلسلہ بھی جاری ہے جبکہ مزید عوامی مظاہروں کے خدشے کے پیش نظر سری نگر میں کرفیو کا سلسلہ جاری ہے ۔ مظاہروں پر قابو پانے کے لیے مزید فوجی دستے بھیجے گئے ہیں ۔مقبوضہ کشمیر کی کٹھ پتلی حکومت نے بھارتی بربریت کے تازہ لہر میں شہید ہونے والے افراد کی ہلاکت کی مذمت کی ہے ۔ محبوبہ مفتی حکومت نے حریت رہنماؤں سے وادی میں امن قائم کرنے کے لئے بھی اپیل کی ہے ۔ وادی بھر میں انٹرنیٹ اور موبائل سروسز بند ہیں ۔ضلع اننت ناگ میں مشتعل مظاہرین کی جانب سے پولیس کی گاڑی دریا میں پھینکنے سے ایک اہلکار ہلاک ہو گیا ۔ حریت رہنما یاسین ملک کو جیل منتقل کر دیا گیا ہے جبکہ بزرگ رہنما سید علی گیلانی ، میر واعظ عمر فاروق، شبیر شاہ اور دوسرے حریت رہنما اپنے گھروں میں نظر بند ہیں ۔