Lahore Iqbal Town plunged kidnapped child found

لاہور کے علاقے علامہ اقبال ٹاؤن سے دن دیہاڑے گن پوائنٹ پر اغوا ہونے والا 6سالہ بچہ رات گئے مل گیا ہے۔ لیکن اغوا کار پولیس کے ہاتھ نہ لگ سکے۔

گرینڈ بیٹری سٹاپ ملتان روڈ کا 6سالہ علی ذاکر علامہ اقبال ٹاؤن سے رکشے پر اسکول سے واپس آرہا تھا۔ دن دیہاڑے 2موٹر سائیکل سواروں نے گن پوائنٹ پر اسے رکشے سمیت اغوا کر لیا تھا۔

اغوا کاروں نے کچھ دور جاکر رکشے والے کو چھوڑ دیا اور بچے کو ایک گاڑی میں ڈال کر لے گئے۔ اطلاع ملنے پر گھر میں کہرام مچ گیا اور پولیس حرکت میں آئی۔

رات گئے پولیس نے اطلاع دی کہ مغوی علی ذاکر کو رسول پارک سمن آباد سے برآمد کر لیا ہے۔ بچہ ملنے پر غمزدہ والدین خوشی سے نہال ہوگئے۔

پولیس کا کہنا ہے کہ اغواء کار بچے کو چھوڑ کر چلے گئے ہیں۔ ڈولفن پولیس کے اہلکار نے بچے کو شناخت کرکے تھانے پہنچادیا ہے۔ پولیس حکام کا کہنا ہے کہ اغوا کاروں تک پہنچنے کے لیے تفتیش کا دائرہ وسیع کر دیا ہے اور جلد انہیں پکڑ لیں گے۔