اسلام آباد(ایس ایم حسنین) کنٹرول لائن کے بروہ اورتندار سیکٹرز پر بلا اشتعال فائرنگ کر کے شہری آبادی کو نشانہ بنایا جس کے نتیجے میں پاک فوج کا سپاہی اور 15 سالہ نوجوان شہید ہو گئے جبکہ ایک خاتون سمیت چار شہری زخمی ہوئے۔ پاک فوج کے شعبہ تعلقات عامہ کے مطابق بھارتی فوج نے کنٹرول لائن پر بروہ اور تندار سیکٹرز میں بلا اشتعال فائرنگ کرکے شہری آبادی کو نشانہ بنایا جس کے نتیجہ میں بروہ گائوں کا رہائشی 15 سالہ نوجوان شہید ہوگیا جبکہ تندار سیکٹر میں کرتان گائوں کی ایک خاتون اور 80 سالہ بزرگ سمیت چار شہری زخمی ہو گئے۔ پاکستانی فوج نے بھارتی جارحیت کا منہ توڑ جواب دیا اور بھارتی پوسٹوں کو نشانہ بنایا جہاں سے فائرنگ کی گئی تھی۔ بھارتی پوسٹوں پر بھاری مالی اور جانی نقصان ہونے کی اطلاعات ہیں۔ فائرنگ کے تبادلہ میں سپاہی شفیق نے بہادری سے مقابلہ کرتے ہوئے جام شہادت نوش کیا. تاہم شعبہ تعلقات عامہ نے بتایا کہ فائرنگ کے شدید تبادلے کے نتیجے میں پاک فوج کا سپاہی شفیق جام شہادت نوش کرگیا۔

خبررساں ادارے کی رپورٹ میں بتایا گیا تھا کہ ضلع بھمبر کے سپرنٹنڈنٹ پولیس میر محمد عابد کا کہنا تھا کہ شام 5 بجے بھارتی فوج کی جانب سے ‘بھاری’ شیلنگ کے بعد مختلف گاؤں اور ساماہنی کی دھال کھمباہ یونین کونسل میں لوگ زخمی ہوئے۔ ان کا کہنا تھا کہ سونا میں بروہ گاؤں کے قریب ایک بستی میں ایک کالج کا طالبعلم اس وقت زندگی گنوا بیٹھا جب ایک مارٹر شیل کا خول اس کے قریب آگرا اور اس کے جسم کو چھلنی کردیا۔متوفی کی شناخت 16 سالہ وحید کے نام سے ہوئی۔ایس پی میر عابد کا کہنا تھا کہ بروہ گاؤں میں دشمن کی شیلنگ سے 60 سالہ راجا مسعود اور 50 سالہ یاسین زخمی ہوئے۔ اس کے علاوہ ان کا کہنا تھا کہ کھمباہ گاؤں میں 25 سالہ مصباح، 22 سالہ محمد سلیمان اور 40 سالہ محمد ظہیر جبکہ رام لوہ گاؤں میں 70 سالہ محمد قاسم زخمی ہوگیا۔ ادھر بھمبر میں ڈیزاسٹر منیجمنٹ افسر کا کہنا تھا کہ متاثرہ علاقے گاڑی اور کئی مکانات کو نقصان پہنچنے کے اطلاعات ہیں۔ دوسری جانب کوئٹہ سے ایک مختصر بیان میں آزاد جموں کشمیر کے وزیراعظم راجا فاروق حیدر ‘آزاد کشمیر کی شہری آبادی پر بلااشتعال بھارتی شیلنگ’ کی مذمت کی اور اقوام متحدہ اور بین الاقوامی برادری پر زور دیا کہ وہ بھارت کے جنگی جنون کا سخت نوٹس لیں۔ واضح رہے کہ 27 ستمبر کو لائن آف کنٹرول پر بھارتی فوج کی بلااشتعال فائرنگ سے پاک فوج کا جوان شہید ہوگیا تھا۔پاک فوج کے شعبہ تعلقات عامہ نے بتایا تھا کہ بھارتی فوج نے ایل او سی کے کوٹ کوٹیرا سیکٹر پر بلااشتعال فائرنگ کی تھی، تاہم پاک فوج نے بھارتی اشتعال انگیزی کا مؤثر جواب دیا تھا اور بھارتی فوجی چیک پوسٹوں کو نشانہ بنایا تھا جس سے اسے جانی و مالی نقصان ہوا تھا۔

LINE, OF, CONTROL, FIRING, ARMY SOLDIER, AND, OTHERS, MARTYRED