Metro bus service
احتجاجی دھرنے کے دوران مشتعل مظاہرین کی جانب سے بس سٹیشنز کو ایک کروڑ بیس لاکھ سے زائد کا نقصان پہنچا
راولپنڈی (یس اُردو) راولپنڈی اسلام آباد میں میٹرو بس سروس چار روز بعد بحال کر دی گئی ، احتجاجی دھرنے کے دوران مشتعل مظاہرین نے بس سٹیشنز کو 1 کروڑ 20 لاکھ روپے کا نقصان پہنچایا ، مرمت کا کام شروع کر دیا گیا ۔ ستائیس مارچ کو ممتاز قادری کے چہلم کے بعد مذہبی جماعت کے کارکنوں نے اسلام آباد کی جانب مارچ کیا ، اس دوران میٹرو بس سٹیشنز پر توڑ پھوڑ کے بعد جڑواں شہروں میں بس سروس معطل کر دی گئی تھی ۔ دھرنے کے اختتام پر چار روز بعد بس سروس بھی بحال کر دی گئی ہے ۔ میٹرو اتھارٹی حکام کے مطابق مشتعل مظاہرین نے میٹرو بس سٹیشنز کو ایک کروڑ بیس لاکھ روپے کا نقصان پہنچایا ۔ میٹرو بس سٹیشنز پر مرمت کا کام جاری ہے جو جلد مکمل کر لیا جائے گا ۔ سی ڈی اے نے ڈی چوک کو صاف کر دیا ہے ۔
