لاہور (ویب ڈیسک ) وزیراعلیٰ پنجاب عثمان بزدار نے سابق وزیراعظم نواز شریف کو فوری ہسپتال منتقل کرنے کی منظوری دے دی۔ محکمہ داخلہ پنجاب نے سروسز ہسپتال منتقلی کے احکامات جاری کر دئیے۔محکمہ داخلہ پنجاب کا کہنا ہے نواز شریف کے ٹیسٹ سروسز ہسپتال میں ہوں گے، سینئر پروفیسرز کی رپورٹ پر نواز شریف کو ہسپتال منتقل کرنے کا فیصلہ کیا گیا، جب تک ٹیسٹ مکمل نہیں ہوتے وہ ہسپتال میں ہی رہیں گے۔یاد رہے گزشتہ روز سابق وزیر اعظم نواز شریف کا کوٹ لکھپت جیل میں میڈیکل بورڈ نے طبی معائنہ کیا اور رپورٹ میں ظاہر کیا کہ نواز شریف کو پیچیدہ مسائل درپیش ہیں، میڈیکل بورڈ نے نواز شریف کو ہسپتال منتقل کرنے کی سفارش کی تھی جس پر لاہور کے سروسز ہسپتال میں خصوصی انتظامات کئے گئے۔ ہسپتال ذرائع کے مطابق نواز شریف کو کسی بھی وقت ہسپتال منتقل کیا جا سکتا ہے۔واضح رہے کہ چھ رکنی میڈیکل بورڈ نے سابق وزیر اعظم میاں نواز شریف کی طبی معائنہ کی رپورٹ محکمہ داخلہ کو بجھوا دیِ ،میڈیکل بورڈ نے میاں نواز شریف کو دل سمیت مختلف مرض میں مبتلا ہونے کے باعث ہسپتال میں منتقل کرنے کی سفارش کردی ۔محکمہ داخلہ پنجاب نے میاں نواز شریف کے طبی معائنہ کے لیے پی آئی سی،آر آئی سی اور آرمڈ فورسز انسی ٹیوٹ کارڈیالوجی کے پروفیسرز پر مشتمل میڈیکل بورڈ تشکیل دیا تھاـایک روز قبل بورڈ نے کوٹ لکھپت جیل میں نواز شریف کا طبی معائنہ کیا تھاـ
