اسلام آباد(اصغر علی مبارک) اسپیکر قومی اسمبلی اسد قیصر نے عالمی برادری پر بھارت کی جانب سے کشمیری عوام کے خلاف جاری اقدامات اور جرائم کا جواب طلب کرنے اور ان کے خاتمے کے لیے کردار ادا کرنے پر زور دیا ہے۔ اسپیکر نے دنیا بھر کی 188 پارلیمانوں کے اسپیکروں اور پرزائڈنگ افسران کے نام بھیجے گئے اپنے خطوط میں ایک بار بھر کشمیر کے دیرینہ تنازعے کے منصفانہ اور پر امن حل کے لیے آزاد اور غیر جانبدارانہ رائے شماری کے ذریعے حل کرنے کی ضرورت پر زور دیا ہے۔

اسپیکرنے عالمی برادری کو یاد دلایا کہ 5 اگست 2020 کو بھارت کے غیر قانونی اور یک طرفہ اقدام کو ایک سال مکمل ہو رہا ہے۔ بھارت کے اس غیر قانونی اور یک طرفہ اقدام کا مقصد مقبوضہ جموں وکشمیر کے آبادیاتی ڈھانچے کو تبدیل کرنا اور کشمیری عوام کی اکثریت کو اقلیت میں تبدیل کرکے انہیں مزید کمزور کرنا ہے۔ انہوں نے کہا کہ اس وقت جب دنیا کورونا کی عالمی وبا کے خلاف مصروف عمل ہے مقبوضہ جموں و کشمیر میں بھارتی افواج کو مکمل چھوٹ حاصل ہے اور مقبوضہ وادی میں بھارتی افواج کی ظلم و بربریت اور غیر انسانی کریکڈاؤن مزید تیز ہوگیا ہے ۔ انہوں نے کہا کہ مقبوضہ جموں وکشمیر کی بدترین صورتحال اور وادی میں بھارت کے نسل کشی کے مذموم منصوبوں کے پیش نظر علاقائی اور بین الاقوامی امن و سلامتی کو شدید خطرات لاحق ہیں۔ انہوں نے کہا کہ اس مسئلے کا فوری اور فیصلہ کن حل کرنا عالمی برادری کی ذمہ داری ہے۔ اسپیکر نے عالمی برادری پر اس انسانی بحران جس سے جنوبی ایشیا اور اس سے باہر خطے کے امن کو خطرا لاحق ہے کا سختی سے نوٹس لینے پر زور دیا۔ انہوں نےکہا کہ عالمی برادری بھارت سے اقوام متحدہ کے زیر اہتمام جموں و کشمیر میں آزادانہ اور غیر جانبدارانہ رائے شماری کرانے کا مطالبہ کرے جس کا وعدہ اقوام متحدہ کی سلامتی کونسل کی قراردادوں میں کیا گیا ہے۔