Murder case against Sadhvi Hindu hardliners in India

انڈیا کی ریاست ہریانہ میں پولیس نے سخت گیر ہندو تنظیم ‘اکھل بھارتیہ ہندو مہاسبھا’ کی نائب صدر سادھوی دیوا ٹھاکر کے خلاف قتل کا مقدمہ درج کیا ہے۔

سادھوی دیوا ٹھاکر مسلمانوں اور عیسائیوں کے خلاف اپنے متنازع بیانات کے سبب پہلے بھی سرخیوں میں رہ چکی ہیں۔

سادھوی ٹھاکر نے مبینہ طور پر ایک شادی کے دوران ہوا میں گولیاں چلائی تھیں جس سے دولہا کے ایک رشتے دار کی موت ہو گئی اور تین دیگر باراتی شدید زخمی ہو گئے۔

جمعرات کو ہریانہ میں پیش آنے والے اس واقعے کی ایک ویڈیو میں سادھوی دیوا ٹھاکر کو گولی چلاتے ہوئے دیکھا جا سکتا ہے۔ ان کے بعد ان کے چھ گارڈز بھی گولی چلاتے ہیں۔

شادی میں موجود رشتہ داروں نے ميڈيا کو بتایا ہے کہ سادھوی پہلے ڈانس فلور پر گئیں اور ڈی جے کو اپنی پسند کا نغمہ بجانے کے لیے کہا۔ پھر انھوں نے وہاں پر رقص کرنا شروع کر دیا۔

اس کے بعد وہ ہوا میں گولیاں چلانے لگیں جس سے آس پاس کے لوگ ڈر گئے۔

دولہا اور دلہن کے گھر والوں نے ان سے ایسا نہ کرنے کی گزارش بھی کی لیکن سادھوی نے کسی کی بھی نہیں سنی۔

اسی دوران دولہے کی 50 سالہ چچی کو گولی لگ گئی اور وہ وہیں ڈھیری ہوگئیں۔ تین مزید لوگ بھی گولی لگنے سے شدید زخمی ہوئے ہیں۔

اس افراتفری کے دوران ہی سادھوی اور ان کے گارڈز وہاں سے فرار ہو گئے۔

پولیس نے اس سلسلے میں سات افراد کے خلاف قتل کا مقدمہ درج کیا ہے اور ان کی تلاش جاری ہے۔

بی بی سی کی گیتا پانڈے کے مطابق یہ پہلی بار نہیں ہے جب سادھوی ٹھاکر غلط وجوہات کے سبب سرخیوں میں ہیں۔

Murder case against Sadhvi Hindu hardliners in India

گذشتہ برس بھی پولیس نے ان کے خلاف مسلمانوں اور عیسائیوں کی بڑھتی ہوئی آبادی پر روک لگانے اور نسبندی کی نصیحت کرنے کے لیے مقدمہ درج کیا تھا۔