اسلام آباد: تحریک انصاف کے رہنما شاہ محمود قریشی نے کہا کہ نادرا حکام این اے 120 میں شفاف ضمنی انتخاب کے راستے میں رکاوٹ بن کر ادارے کی ساکھ کو مجروح نہ کرے۔

Nadra should not sore the reputation of his organization, Shah Mehmood Qureshi

اسلام آباد میں الیکشن کمیشن کے باہر میڈیا سے گفتگو کرتے ہوئے تحریک انصاف کے وائس چیئرمین شاہ محمود قریشی نے کہا کہ سیکرٹری الیکشن کمیشن سے ملاقات کی ہے، سیکرٹری الیکشن کمیشن کو این اے 120 میں ضابطہ اخلاق کی خلاف ورزیوں کے حوالے سے آگاہ کیا، میں نے این اے 120 میں انتخابی مہم چلانے کے لیے الیکشن کمیشن سے درخواست کی تھی اور الیکشن کمیشن نے مجھے انتخابی مہم چلانے کی اجازت نہیں دی تھی۔

شاہ محمود قریشی کا کہنا تھا کہ یونین کونسل 50 اور51 میں بہت سے ایسے ووٹ ہیں جن کے آئی ڈی کارڈز بلاک کردئیے گئے ہیں، مسلم لیگ ن کے وزرا اور اراکین اسمبلی ضابطہ اخلاق کی پاسداری نہیں کر رہے، لیگی ارکان ضابطہ اخلاق کی دھجیاں اڑا رہے ہیں، صوبائی وزیر بلال یاسین کو الیکشن کمیشن نے تین بار نوٹس دیا اور وہ پیش نہیں ہوئے جب کہ ہمیں تحریک انصاف سے زیادتی کا خدشہ دکھائی دے رہا ہے۔

پی ٹی آئی رہنما نے کہا کہ شفاف انتخابات کے راستے میں نادرا رکاوٹ نہ بنے، اگر ایک امیدوار کو کوریج دی جا رہی ہے تو سب امیدواروں کو کوریج دی جائے، جو بھی غیر اخلاقی اورغیرقانونی چیزہوگی اس پر لوگ اعتراض کریں گے، وزیر اطلاعات اور ایم ڈی پی ٹی وی سے درخواست ہے وہ اس بات کا نوٹس لیں اوراگرن لیگی امیدوار کی کوریج نہ روکی گئی تو ہم احتجاج کریں گے۔ شاہ محمود قریشی نے کہا کہ این اے 120 میں کئی پختونوں کے شناختی کارڈز بلاک ہیں، بلاک شناختی کارڈ کے باعث وہ پختون ووٹر فہرستوں سے باہر ہیں، پختونوں کا ووٹ تحریک انصاف کے ساتھ ہے، شفاف انتخابات کے راستے میں نادرا رکاوٹ نہ بنے اورنادرا اپنے ادارے کی ساکھ کو مجروح نہ کرے۔