national issue

اسلام آباد………پی آئی اے کی نجکاری کے مسئلے پر اپوزیشن لیڈر خورشید شاہ کا کہنا ہے کہ وزیراعظم مصیبتیں جھیلنے کے بعد بھی سیاست دان نہیں بن سکے، شاہ محمود قریشی کہتے ہیں کہ حکومت نے پی آئی اے کی نجکاری کا بل اکثریت کے زور پر پاس کروایا، سراج الحق نے کہا کہ جب تک ملازمین احتجاج پر ہیں ان کے ساتھ ہیں۔
پی آئی اے کے مظاہرین سے خطاب کرتے ہوئے خورشید شاہ نے حکومت کو خوب آڑھے ہاتھوں لیا، بولے افسوس میاں صاحب مصیبتیں جھیلنے کے بعد بھی سیاستدان نہیں بن سکے، انہوں نے وفاقی اور سندھ حکومت سے کراچی واقعے پر جوڈیشل کمیشن بنانے کا مطالبہ بھی کیا۔ شاہ محمود قریشی نے کہا کہ ن لیگ نے ایوان میں اپنی اکثریت کا ناجائز فائدہ اٹھایا، نجکاری کے لیے آرڈیننس زبردستی بل کی صورت میں پاس کرایا۔ امیر جماعت اسلامی سراج الحق نے کہا کہ جب تک ملازمین احتجاج پر ہیں ان کے ساتھ ہیں، انہوں نے گزشتہ روز کراچی میں جاں بحق ہونے والے پی آئی اے ملازمین کی غائبانہ نماز جنازہ بھی پڑھائی۔