راولپنڈی; راولپنڈی کے حلقے این اے 59 سے (ن )لیگ کے گرفتار امیدوار قمر الاسلام کے بیٹے سالار اسلام نے کہا ہے کہ میرے والد کی الیکشن مہم سابق وزیراعظم نوازشریف چلائیں گے ۔پریس کانفرنس کے دوران سالار اسلام نے کہا کہ لندن سے مریم نواز نے انہیں فون کیا ہے اور کہا ہے کہ وہ الیکشن میں ہمارے ساتھ ہوں گی ۔انہوں نے کہا کہ (ن) لیگ کی قیادت بھی جلسوں میں ساتھ ہوگی ،ساتھ دینے سے والے اور قافلے میں شامل کارکنوں کا شکریہ ادا کرتا ہوں۔دوسری جانب مسلم لیگ ن کے قائد نواز شریف کا کہنا ہے کہ اگر انتخابات میں دھاندلی ہوئی تو طوفان اٹھے گا جسے سنبھالنا مشکل ہو گا۔لندن میں میڈیا سے بات کرتے ہوئے نواز شریف کا کہنا تھا کہ ساری توپوں کا رخ ن لیگ کی طرف ہے، ہمارے انتخابی امیدوار کو بلا کر ڈرایا دھمکایا گیا اور ملتان میں ہمارے امیدوار رانا اقبال سراج کو تھپڑ مارے گئے اور خطرناک نتائج کی دھمکیاں دی گئیں۔ان کا کہنا تھا کہ ہمارے نمائندوں کی وفاداریاں تبدیل کرائی جا رہی ہیں اور جیپ کے نشان پر الیکشن لڑنے پر مجبور کیا جا رہا ہے، ہمارے نمائندوں کی تذلیل کی جارہی ہے۔سابق وزیراعظم کا کہنا تھا کہ ہم نے غلطیوں سے کوئی سبق نہیں سیکھا لیکن ایسے اقدامات ملک کے لیے نقصان دہ ہوں گے۔انہوں نے کہا کہ نگران وزیراعظم اور چیف الیکشن کمشنر سے مطالبہ کہا کہ ن لیگ کے امیدواروں کو دھمکیوں کا نوٹس لیں۔ان کا کہنا تھا کہ اگر انتخابات میں دھاندلی ہوئی تو طوفان اٹھے گا جسے سنبھالنا مشکل ہو جائے گا۔